|
سرور اسرع رجل في العالم
:228:
سرور من كان صغير وهو حلم حياته يكون انسان سريع من يوم بدأ يمشي وهو يطب ويطيح (من مصطلحات الشياب) حتى وهو بالمدرسه في النشاط الرياضي يشارك بفعاليه ويمثل مدرسته في مسابقات المدارس وكان هو المميز في مدرسته وما شاء الله عليه انسان صبور ومكافح وله جماهيرية كبيرة في مدرسته دائماً بالسباق ترتيبه الاخير بس للامانه سرور في مسابقة الماراثون كان غير السباق ابو يوم ينتهي بثلاث ايام مو لان الاحوال الجوية سيئة ابداً كلهم يوصلون بنفس اليوم وسرور يشد شنطة الكشتات وهو بالطريق يهفه راسه ويبغى قهوه ولا براد شاهي ما يحرم نفسه من شيء لاجل كذا مضطرين يجلسون حتى يحضر المتسابق الاخير هذا الكلام كله ما كان يعجب سرور كان وده يكون مثل النفاثه سريع ويقدر يلحق الارانب والجرابيع بس وش السوات لو ينفع فيه ترهيم كان رهم نفسه (الترهيم هو التعديل في السيارات) بيوم طلع سرور للسطح يركب له دش القنوات وهو طالع الدرج وشايل على ظهره كل العده زلقت رجله وحاول يقف ويثبت نفسه ولكن خلاص ما عاد يقدر طاح سرور على ظهره وضرب راسه بالجدار اغمى عليه من العصر ولا فاق الا الفجر وش ذا هاه وش صار كل الي يتذكره انه كان طالع الدرج وطاح المهم يتفقد نفسه الحمدلله لا دم ولا غيره ولا فيه فقشه ولا شي ثاني راح واغتسل ويسمع اقامة الصلاة وراح يصلي سرور يحس فيه نشاط مو طبيعي على غير العادة راح يتمرن على الجري مثل كل صباح وحاط ساعة الصفر حقت العداد بيده شغلها وهو العادة ما يخلص المسافه الا بساعه بدا يجري وينظر بالساعة وهو مو مصدق خط النهاية قريب وهو باقي ما حس بتعب ثواني وش ذا القدرة والعزم 380 حصان وصل النهاية قال لا مو معقول يمكن الساعه خربانه ولا انا عقلي فيه شي مشى وراح لبيته بعد العصر راح للمعسكر حقهم لابس ملابس الرياضة ومتجهز كالعادة لازم يسابق الي دائماً يفوزون عليه جاهم سرور هيا يا شباب خلونا نتدرب وهم يطقطقون عليه وش تبي تسابقنا فيه يا السلحفاة وهو بكل ابتسامه أمل يناظر فيهم وكله طموح هالمره قالوا بنجري معك بأقل سرعه وان شاء الله تقدر تلحقنا قال طيب طيب هيا توكلنا على الله بدأ السباق وهم يجرون قدامه كالعادة وهو وراهم تعثر وطاح وقام وبدأ يجري قالوا لبعضهم شفتم البطيء شدينا بس خلونا نتمرن مالنا وماله وهم يتنافسون مع بعض الا واللي تعداهم وسبقهم مثل البرق اعوذ بالله وش ذا الي تعدانا شوي ويهدي الا وهو سرور ما شاء الله وشلون هاه كيف ما عرفوا وش يقولون وهو مو مصدق انه سبقهم لا هذا انجاز كبير لازم افرح وارقص واغني اخيراً سبقتهم طموحه كان بسيط ما يفكر الا كيف قدر يغلب اخوياه ويهزمهم كان بالمدرجات بالصدفة الي كانت بلا ميعاد مدرب المنتخب في العاب القوى كان جاي يزور صديقه مدرب سرور بس ما لقاه راح ينتظره بالمدرجات وشاف سرور الطلقه قال خلاص هذا الولد لازم اشيله معي للمنتخب هذا الي بيجيب الانجازات ان شاء الله جاء مدرب سرور والتقى مع خويه مدرب المنتخب قال مدرب المنتخب وش ذا الكنز الي عندك وهو يأشر على سرور مدرب سرور ضحك بإستغراب سرور كنز مدرب المنتخب :ايه هذا الي بيجيب لنا الانجازات ان شاء الله مدرب سرور :يا ابن الحلال ناقصين.. شكلك تمزح ولا ضاربتك شمس مدرب المنتخب :لا والله مافيني الا العافيه وشفت سرور يسابق زملائه وكانت سرعته غير طبيعية كأنه نفاثه مدرب سرور :السلحفاة!!! مدرب المنتخب: طيب وش رايك تجيب اسرع لاعب عندك وتحطه بسباق مع سرور مدرب سرور :فاضين للسباق اكيد سرور بيكون خسران مدرب المنتخب :جيب اسرع لاعبينك وشوف راح مدرب سرور وجاب افضل لاعبينه وجمعهم هو وسرور وقال لهم ترى مدرب المنتخب بيختار واحد منكم لذلك رتبنا سباق جري بينكم انتم الاثنين سرور: اخيراً جات الفرصه.. انا جاهز يالمدرب تجهزوا واعلن المدرب انطلاق السباق وش ذا الي يصير مو معقول ما خطى اسرع المتسابقين خطوتين الا سرور بخط النهاية ومدرب سرور مو مصدق ومدرب المنتخب يصفق ويشجع احسنت يا سرور تم ضم سرور للمنتخب هنا راح تبدأ مرحلة جديدة بحياة سرور بدأت حياة سرور تتغير أخيراً صار مهم والكل يبحث عنه طلع سرور مع بعثة المنتخب في معسكرات خارجية وكان في كل دولة يعسكرون فيها ينظمون سباقات مع ابطالها الدوليين سرور حطم الارقام القياسية وتغلب عليهم كلهم صارت النفسيه زفت لكل الي فاز عليهم سرور وش ذا الكابوس محد يقدر يغلبه قربت الالعاب الاولمبية الدولية وصلت بعثة المنتخب وسرور جاهز كل وسائل الإعلام تبحث عنه كل المتسابقين خايفين يكون معهم عز الله لا اخذوا ميدالية ولا غيرها سعيد الحظ الي ما يكون من المنافسين لسرور في كل مكان لابد يكون فيه مؤامرات وغش بعد ما تحدد الاشخاص والاسماء الي راح يتنافسون مع بطلنا سرور اجتمعوا المنتخبات ولاعبيهم يخططون كيف نبعد هذا المصيبة من طريقنا قال واحد منهم نصدمه بسياره وهو خارج من الفندق التفت عليه المدرب حقه وصكه بكف انت بتودينا بمصيبة ان ذبحناه فتحوا التحقيقات ونروح فيها قال الثاني نحط له بالعصير الي يقدمونه لنا مسهل يخليه يطلع من السباق ويروح الحمام ونفتك منه سرور من يوم قام من النوم وهو معه اسهال وحالته حاله حاولوا يعالجون وضعه وعيا يستجيب للعلاج وش الحل الحين السباق بعد ساعه من الحين قال طبيب الفريق وش رايكم نلبسه حفايض كبار السن وبعد السباق نوديه للمستشفى نسوي له غسيل للمعدة ناسبتهم الفكره بس من يكلم سرور ويقنعه الحين قال مدرب المنتخب خلوها علي مدرب المنتخب :سرور واضح انك مريض ولا تقدر تشارك في السباق.. خلاص نوديك للمستشفى اهم شي صحتك والالعاب الاولمبية تشارك فيها السنه الجايه ما عليك سرور :هااه وش تقول... لا لا تكفى ابغى اشارك هذا حلم حياتي كلها اني اشارك بالسباق مدرب المنتخب :بس وشلون تشارك وانت مريض؟ سرور :ما عليك مني اقضي حاجتي قبل السباق بدقيقة واجملها الى نهاية السباق مدرب المنتخب: ما ينفع يا سرور المتسابقين لازم يكونوا بالمضمار قبل وقت طويل من السباق سرور: طيب وش الحل يعني مدرب المنتخب: الحل موجود بس يمكن ما يعجبك سرور :هات الحل الله يرضى عليك مدرب المنتخب :الحل انك تلبس حفايض كبار السن سرور: نعم نعم.. وش تقول لا لا منت صاحي انا بعمري ذا باقي ما طحت واقدر اقوم بنفسي مدرب المنتخب :انت شكلك ما تبي تشارك سرور: هات الحفايض البسها طلع سرور للمضمار وهو مدنق راسه ومستحي جات له بنت مزيونه وخق معها وقدمت له العصير الي فيه المسهل شرب سرور العصير وهو يقول يا زينه يا زيناه يهبل يدوخ سبحان من سواه حس ان بطنه فيه شي مو طبيعي ما يعرف وشلون يوصفه بقية المتسابقين طبعاً انبسطوا الخطه بتنجح هذا الحين يروح للحمام ويبدأ السباق ونفتك منه يعتبر منسحب سرور :زين اني طاوعت المدرب ولابس الحفايض والله ما اطلع الا بعد نهاية السباق مر الوقت والمتسابقين ينظرون بسرور هذا متى بيطلع شافوا وجهه تقلب لونه وتغير وهو ما تحرك من مكانه متى بيطلع وبيروح ويفكنا منه جاء الحكم ويكلم المتسابقين كل واحد منهم راح لحارته الي هي الخانه حقته جاهزين انتم.. سرور بصوت عالي ايه جاهزين ايه جاهزين هيا بس الحكم 3 2 1 انطلق سرور يجري وسبقوه المتنافسين وهو يحس بالثقل الرجال معه حموله وش يسوي الحين تذكر ان هذا حلم حياته وانه ممكن ما يتكرر فجأة ويرجع لوضعه الطبيعي وينطلق مثل الطلقه من جنبهم الذهول والصمت يخيم على كل الحاضرين من هذا المذهل الخارق السريع وصل سرور للنهاية وباقي المتنافسين ما وصلوا وعلى طول على الحمام قضى حاجته ورجع للمضمار والمتنافسين معه يبكون ويتصايحون خطتهم وتدبيرهم باء بالفشل النية الطيبه دائماً تغلب سرور فاز بالميدالية الذهبيه وفوق ذا حقق الرقم القياسي فاز بزمن محد قدر يحققه قبله سرور صار بطل قومي بدأت شركات الاعلان والدعاية تبحث عنه هذا صار مطلب مهم حس سرور ان الشهره بدت تأثر على حياته وكسب ثروات ومبالغ كبيرة بس ما ناسبه الوضع قرر يختفي وينسحب ويروح لمكان ويرتاح من اضواء الشهره سرور راح واختفى البطل القومي راح في ظروف غامضة والكل يسأل عن سرور :121: |
تسلم الأيادي على ما قدمت ننتظر جديدك بكل شوق تقبل مني أعطر التحايا سمأأأأأرا |
عاشت الايادي التي طرزت تلك الكلمات
وعطرت أحرفها بالورد والريحان سلمت يداكم راقت لي مكنونات قلمكم مساؤنا بكم أجمل دائماً انتم على قمة الحرف تتربعون دمتم بخيروسعاده لا تغادر ارواحكم |
طرح جميــــــــــــل
ومجهود رآئع ومفعم بآلجمال وآلرقي.. يعطيك آلعافيه على هذآ آلتميز .. وسلمت آناملك آلمتألقه لروعة طرحهآ.. ودي لك ولروحك ,,~ |
سلمت يدآك على روعة الطرح
وسلم لنآ ذوقك الراقي على جمال الاختيار لك ولحضورك الجميل كل الشكر والتقدير اسأل البآري لك سعآدة دائمة:20: |
يع ــطيك الع ــآفية ولآ ع ــدمنآ تميز انآملك الذهبية دمت ودآم بح ــر عطآئك بمآ يطرح متميزآ بنتظآر القآدم بشووق مآآآآآنـــــنـــحرم من جديد آلمتميز لروح ــك بآقآت من الجوري |
| الساعة الآن 10:01 PM |
Powered by vBulletin® Copyright ©2024, Trans. By Soft
new notificatio by 9adq_ala7sas
HêĽм √ 3.1 BY: ! ωαнαм ! © 2010
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd.
تنويه : المشاركات المطروحة تعبر عن وجهة نظر أصحابها وليس بالضرورة تمثل رأي أدارة الموقع