الجو ممطر والبروق انعشتني ..
والغيم دمعه بالمحاجر هماليل .
غيمه تهل دموعها واغرقتني ..
تنثر على صدري هموم وغرابيل ..
عقب البطا بالغايبه ذكرتني ..
ام العيون الناعسات المظاليل ..
عجزت لا أنسى حبها لو نستني ..
ارسل وترفض لا ترد المراسيل ..
قبل تغير ليتها غيرتني ..
او واعدتني بالليالي المقابيل ..
خبري بها توفي ليا واعدتني ..
لا شك راحت دون شرح وتفاصيل ..
لا كملت جرحي ولا عالجتني ..
راحت كذا واختارت القال والقيل ..
بس الوكاد من المنام احرمتني ..
شغلي مراقب موقع الجدي وسهيل ..
حاولت اداري دمعتي وفضحتني ..
ورفعت للهجران بيض المناديل ..
في دايرة ذاك الغرام سجنتني ..
يوم المواصل والدلع والتعاليل ..
ياما على ساعة لقى حاسبتني ..
تبي تنكلني عن الهجر تنكيل .
هي للغلا هي للوفى علمتني ..
هي قالت ان البرق ما يتبعه سيل ..
لو غادرت روحي ولا غادرتني ..
اهون من اللي شافت العين بالحيل ..
ان نمت صورتها مع الحلم جتني ..
وان قمت اسويها بشعري مواويل ..
حسبي عليها غادرت واتركتني ..
بين السهر والحزن والشعر والليل ..
غابت وراحت عقب ما ولعتني ..
بالورد والسكر وبيض الفناجيل ..
شربت من خمر الكرز واسكرتني ..
وانا الذي ما فارق البن والهيل ..
بالحب راحت بي ولا رجعتني ..
عاقل وكني من حساب المهابيل ..