كام مرة كنت هتقعد تشرح الموضوع
وبعدين مسحت اللي كتبته وكتبت إنت حر
كام مرة كنت هتحكي اللي وجعك واتراجعت
وكتبت الحمد لله بخير
كام مرة كنت هتلوم على حد وبعدين
كتبت لا خالص مفيش حاجة
كام مرة كنت هتخالف في الرأي
وبعدين كتبت إنت صح
كام مرة حطيت ايموشن بيضحك
وانت وشك ساكن
كام مرة إتسألت فينك
وقلت موجود وإنت تايه
كام مرة إتقالك إبقى طمني عليك وبدل
ما تقول أنا مش كويس قلت حاضر
كام مرة قلت خلينا نشوفك وإنت مش طايق تشوف حد
كام مرة كنت هتبرر لحد حاجة فهمها غلط
ومسحت اللي كتبته ومردتش أصلا
كام مرة إتاخد رايك في حاجة وقلت
حلوة عشان متدخلش في جدال
كام مرة هربت من الناس في الشارع
كام مرة إعتذرت عن خروجة
كام مرة شفت اللي بيتصل بيك ومردتش
كام مرة قلت واحشني مجاملة
كام مرة قريت الرسالة من برا وقلت مشفتهاش
في كل عدد المرات دي لو جمعتها على بعضها
هتظهر شخصيتك المطفية المختفية
ورا الردود التقليدية واللي محدش يعرفها
ولا حد اهتم بيها الناس عاوزة تسمع
منك الكلام ده وخلاص
كلنا كلنا مستخبيين ورا شخصيات
مش بتاعتنا والشخصيات كلها بقت متشابهة
لأن كل واحد مخبي اللي حاسس بيه
ورا ضهره ولو واحد بس قرر يتكلم
هتشوف العجب وهتشوف
اللي عمرك ما كنت تتوقعه
أنا بخير الحمد لله كله تمام فينك
واحشني خلينا نشوفك إنت صح
متنسناش بقى لا خالص
كل دي كلمات من قاموس البشر
اخترعوها عشان يداروا بيها كلام زي فيضان البحر
لكن محدش يملك الجرأة إنه يظهر إنه يبوح
لأن الطرف التاني مهما كان مش
هيسمعك ولو سمعك مش هيفهمك
ولو إعترفت لحد بغلطة إرتكبتها
هيركبلك قناع القديس من وسط الاقنعة
اللي شايلها عنده ونسي إن كله عيوب
هو كمان لأنه بشر لكن لأنك إتعريت
قدامه عمره ما هيتعرى هو كمان
لا ده هيمسك كرباج ويجلدك بيه
إوعوا تخلعوا القناع
انا نصحتكم
وانتم احرار
لكم كل تحياتى وتقديرى
الدكتور علــى

[SIGPIC][/SIGPIC]