لسه برغم سنين البعد بتسكني فيا
لسه بشوفك جوه القلب
لسه انا سامع صوتك نبض
لسه بقولك
انتى حبيبتي وروحي وساكنه
جوه النني وضي عنيا
لسه انا بمشي
في كل مكان كلمتك فيه
لسه بسلم قلبي لقلبك
لسه بعلم قلبي مايبكي
علي حب مش اصلا ليه
فاكرة زمان انا لما عاهدتك
وانتى عاهدتى
تكونى الدنيا وسندى وحيل
لسه انا صاين عهدى معاكي
ورغم بعادك
يمكن حتى تكونى نسيتي
بس انا فاكرك
لسه انا شايفك ليا دليل
قالوا زمان من باعك بيعوا
قولت ازاى ؟
حد يبيع الحلم بتاعه
وصوت الناى
حد يبيع إحساسه وهى معايا
في كل دقيقه
فى عز الفرح
وعز الجرح
حتى معايا في قوله اى
قالوا خلاص نسياك ياحزين
عايشه وفرحانه باوجاعك
هى مهيش حساك من أصله
وفرحانه بجرحك ووداعك
قولت انا عندى العذر عشانها
لو نسيتني لسه فاكرها
ولسه بشوفها فى غنوة بقولها
لسه في كل قصيدة بجيبها
تشرب والله معايا الشاي
فاكر اخر مرة سابتني
ومشيت وحدى
بوسط طريق مقفول من بابه
ضربه صابتني
واصعب ضربه ياخدها الواحد
لما تكون من ايد أحبابه
انا مغلطتش لما عشقتك .. انا مغلطتش
انا حبيتك حب مالوش أول من اخر
حب ورب الكعبه كأنه من نوع فاخر
حب كأنه حب زليخه ليوسف
شوفي كام عام ؟
حب كنوز الدنيا رخيصه
ومينفعش معاه ارقام
بس خسارة
فجأه رميتي قلبي لوحده بدون اسباب
وكاني انا عاشق كافر
هو جزاتى عشان حبيتك حب بجد
.. حب مالوش أول من اخر
انا دلوقت بقيت حاجه تانيه
اسمي مسمع جوة وبرة
شاعر .. بيغني بحواديتك
وازاى اول مرة قابلتك
وازاى برضه كمان حبيتك
وبقيت اسمي كمان القيصر
علشان كل اغاني القيصر لذقت فيا
اطلع من بدله ألحانه بكام موال
الاقيني في عبايه عشق بكام اغنيه
يارب قلبي لم يعد كافيا لأن من احبها تعادل الدنيا
فضع بصدرى واحدا غيرة يكون في مساحه الدنيا
وارجع افوق وفي لحظه اشوفك
قدام عيني وارجع ليكي ما بيني وبيني
والمس ايدك وافرح جدا لو تاخديني
يادى الخيبه ماتصحي ياعم
مالك شايل الويل كدا ليه .؟
. وعيشه امك غم في غم
انساها دى خلاص نسياك
مش فاكراك
سافر باحلامك وطموحك مليون مرة
غني وقول الشعر وسافر .. مليون قارة
ما انا مش قادر انسي كلامها
ولا ضحكتها
حتى بقيت ع المسرح بنسي
وبدال ما اغني بأشعارى
بفضل اغني حبيبتي الحلوة ..
اللي سابتني ونسيت حبي ..
كانت سمرا
ـــــــــــــــــــــــــــــــــــــــــــ
#تامر_النقيب
#خربشات_نقيبيه
[IMG][/IMG]