مرت الستين
الستين والشايب طفل
توي أدرس في كتاتيب الحياه
مرت الستين مازال الجهل
كل ما جيت استره يكشف غطاه
مرت الستين فكري ما اشتعل
كلمااشعل جذوته وقتي طفاه
مرت الستين دربي ما كمل
واقف في راسه أتأمل مداه
ألتفت والوقت يدفعني عجل
ماانتهيت من امس وباكر ذا سناه
كل يوم أقول في باكر أمل
وان حضر باكر رجيت اللي وراه
أرفع الهقوات لو حظي نزل
واقنص القاع الذي ما احد وطاه
المراجل ما بطلبتها خجل
يخجل اللي يقدر الطيب وعصاه
السنين اشعار والشاعر مثل
يفهمه من شاف بالعقل وقراه
أكتب الايام في شعري غزل
كل بيت عاش في عمري حياه
|