كل ما يلزم الطفل حديث الولادة و الأم أيضا بالتفصيل الممل
خلاص الوقت قرب ... ؟
و بتجهزى نفسك للولاده... ؟
محتارة تجهزى إيه فى الشنطه اللى هتاخديها معاكى و إنتى رايحه تولدى .. ؟
ما تحتاريش ... !
و ما تفكريش كتير .... !
تعالى و أنا هقولك
إحتياجات البيبى
الضيف الجميل اللى هيشرف و ينور عليكى الدنيا
ملاحظه علشان نكون متفقين
اللى هقوله ده كلام علمى من فم دكتور الأطفال اللى بتابع معاه من زمان
البيبى إنسان زى أى إنسان
بيحس بالحر و البرد
يعنى لو الجو حر بلاش نتقل عليه
فى ناس كتير بتعتقد إن البيبى مش بيحس بدرجة الحرارة
كلام غلط فى غلط
البيبى زيه زينا بيحس بالحر أو البرد
لو الجو حر بلاش نتقل عليه علشان التسلخات
نيجى بقا لأحتياجات البيبى
** فانلات كت و نص كوم و لازم تكون قطن
لو صيف ممكن تجيبى أكتر شويه علشان تغيريله براحتك
** شايات هتحتاجيها لو الجو بارد
لو فى الصيف مالهاش لزوم
** ملابس النوم ( سالوبتات أو جلابيه البيبى )
و أنا بفضل الجلابيه لأنها بتريح البيبى أكتى فى الحركه
و أسهل ليكى لما تيجى تغيرى للمولود فى الليل
و برضه لازم تكون قطن خالص
لو فى الصيف بتكون نص كوم و لو فى الشتاء بتكون بكوم
** الحفاضات
الحفاضات مقاسات فلما تيجى تشترى تشترى أصغر مقاس
و خدى بالك إن الحفاضات فى الصيف بتسلخ المولو د فياريت تستخدميها فقط وقت النوم و فى النهار إستخدمى الحفاضات القطن مع ملاحظة عدم ترك الطفل مبلول ( يعنى تغيريله بإستمرار معلش هو تعب شويه لكن الجنه تحت أقدام الأمهات )
** اللفف البيضاء
لأن البيبى فى الأول مش بيعرف يلبس بنطلون علشان السرة
لكن بعد ما تقع السرة ممكن تلبسيه شورت أو بنطلون بعد الحفاضه
** البافته
علشان لو المولود رجع بعض اللبن بعد الرضاعه
و نصيحه لو نزل عليها قشط ( لبن زيادة من فمه بعد الرضاعه ) تغيريها علطول علشان ما تسلخش الرقبه و كمان بتعمل رائحه غير مستحبه للبيبى
** شربات
لو الجو بارد
فى الصيف مالهاش لزوم
** ملابس خروج
و ما تكتريش لأن مقاس البيبى بيختلف بسرعه
** كوفرته
على الأقل إتنين و يكون لها غطاء رأس
لو فى الصيف تجبيها خفيفه
و لو فى الشتاء بتكون زى البطانيه
و دى بتلفى بيها البيبى و إنتى خارجه
** الملايات
مش هتحتاجى ملايات للبيبى لأنه فى الأول و لمدة ستة أشهر بينام جنبك علشان الرضاعه
لكن لو ليه سرير صغير جنبك يبقى هيحتاج أطقم ملايات صغيرة
** المشمع
علشان ما يبلش الفرش و ده إستخدامه بالنهار
و لاحظى تحطى فوق المشمع أى حاجه من عندك تكونى مش محتاجاها و تكون قطن علشان المشمع ما يدايقش البيبى و طبعا لما بتتبل بتغيريها
** 2 بشكير للحمام.
البشاكير ذات غطاء الرأس تكون مفيدة.
· فوطتان صغيرتان أو أكثر.
لتنظيف فم الطفل إذا خرج من فمه بعض اللبن.
** بيبرونه
مستلزمات نظافة الطفل:
** · كحول؛ لتنظيف سرة الطفل.
** قطرة علشان عيون البيبى و دى بيكتبها دكتور الأطفال
** · صابونة وشامبو (الأنواع الخاصة بالأطفال حديثى الولادة).
** · كريم للوقاية من الالتهابات الجلدية التى تنتج من استخدام الحفاضة و بلاش إستخدام البودرة.
** زيت بيبى جونسون للأطفال
** · قطن.
** · المناديل المبللة الخاصة بتنظيف قاعدة الطفل.
يمكنك أخذها معك عند الخروج حتى لو كنت تفضلين استخدام القطن والماء عند التغيير لطفلك فى البيت
*** و لو الطفل سلخ منك بلاش إستخدام المناديل المبلله و لا التشطيف بالماء
إستخدمى زيت بيبى جونسون مع قطنه و نظفى قاعدة الطفل بالراحه و بعدين إدهنى كريم التسلخ
** إسفنجة للحمام.
و خدى بالك ما فيش ميه تيجى عند السرة لو لسه ما وقعتش
** تيرمومتر أو شريط قياس الحرارة
** فرشاة ناعمه لشعر البيبى
كماليات ممكن تستغنى عنها
عربة أطفال.
·سرير للطفل
· الحمالة التى ترتديها الأم لحمل الطفل عند الخروج.
· كرسى سيارة لطفلك.
هذا الكرسى ضرورى لأمان طفلك فى السيارة.
· سرير محمول لطفلك (كارى كوت).
· بانيو بلاستيك صغير.
دى كل حاجه ممكن تحتاجيها للبيبى
اللى هتحتاجيه و إنتى فى المستشفى
طبعا هاتاخدى فى الشنطه معاكى حاجات بسيطه
زى غيارين أو ثلاثه للبيبى على حسب فترة قعادك فى المستشفى
و الكحل و قطن علشان السرة و الزيت و البامبرز و فوطتين للبيبى و الكوفرته
و البيبرونه و بيبى كالم وده عبارة عن مشروب بيهدى معدة الطفل لأنه أعشاب
و لو هتولدى قيصرى مش بتقدرى ترضعى علطول
فبيعملوا منه للبيبى عقبال ما تقدرى ترضعيه
و كمان بين كل كام رضعه إعملى منه للبيبى علشان التقلصات اللى بيسببها اللبن
أما بالنسبه ليكى
هتاخدى 3 غيارات و حفاضات كبيرة الحجم أو فوط صحيه
و ملابس داخليه و 3 فوط فرشة شعر و شبشب و ممكن روب
أعتقد كدة ما نستش حاجه
و ترجعى بالسلامه إنتى و المولود
عضويتي 
كل ما يلزم الطفل حديث الولادة و الأم أيضا بالتفصيل
العرض العادي
