علا فياله
___________
ازاي خذلوك !!!!!!؟
وبدون تفكير في العشرة باعوك
وقدرت ازاي تبعد عادي
من غير ما تعادي ف ناس خدعوك
وضحكت ازاي وانت الموجوع
وكابرت وقولت بلاها دموع
أنا أموت م الجوع
ولا إني أبان عاجز منهم
طب قولي ازاي عايش بينهم !!!
وكأن الجرح طبيب نفسه
ازاي شايف بكره ف ليلهم
و ازاي راح تطلع يوم شمسه ؟؟!!
👇👇👇👇👇👇👇👇👇👇👇👇👇👇👇👇
أنا حد اتحمل ما اتألم
ومكمل عادي في مشواري
وبشوف خذلاني عشان صدقي
كان كل مشاعري وأفكاري
وضماير الناس كلها صافيه
وقلوبها دي أهلي وحراسي
أنا حد. صريح جدا لكن
كان كل جريمتي ف احساسي
فكابرت ف جرحي و عديته
ف لقيته بيصغر ف عيوني
وإن كان ع الحب اللي إديته
فأنا فزت بذاتي وخسروني
ــــــــــــــــــــــــــــــــــــــــــــــــــ ــــــ
#علافياله
[IMG]
[/IMG]
تامر النقيب
______________
والنبي دة سؤال ؟
المال بيغير فى الأحوال
تتباع عادي .. وأقرب ناسك
من كاس الحزن كتير يسقوك
والنبي دة سؤال ؟
ازاي خذلوك !!!!!!!؟
خذلوني ومكنتش فاهم
إن انا ممكن أتباع ببلاش
وإن المصلحة راح تبقي أهم
واللي بيقدر ما بيستناش
والهم بيجي بدون إنذار
والنار بتقيد من أفعالهم
وكأني مابيني وبينهم تار
بس بكبر راسي وعادي
لما باعوني قضيتها طناش
بضحك أحيانا علي نفسي
كنت بقول إزاى أهلك .. ممكن يبعوك
اهلك وهتهلك لو تبعد ..
دول فعلا من صغرك حبوك
ومحال يسبوك فى الدنيا تتوه
أوتمشي بعيون عميانه
وتشوفها طشاش
خذلوني ومكنتش فاهم
إن أنا ممكن أتباع ببلاش
خذلونى كمان لما شافوني
قلبي الطيب بيمد إيديه ليهم بالخير
وبضيع عمرى عشان يرضوا
وأخلي أصغرهم يعلى
ويبان قدام الخلق كبير
خدوا مني العمر وسابوا المر
خلونى فى وحده وأحزانى وخداني أسير
وبرغم دا كله أنا مش زعلان
فرحان إنى فى نظر نفسي أكبر منهم
والجي في أيامي هيحلو
وبقولها وعاوز أطمنهم
أنا من غيركم وكأني أمير
أنا كاتم أوجاعي في روحى
وعمال بضحك وبغني يغني معايا الطير
والدمع اللى صاحبني سنين سابني
والفرح اهو واقف على بابي
وواخدنى معاه كل المشاوير
ولاعاوز حد في يوم أعاديه
وعاوزهم فعلا ينسوني
واللي يحبنى أهو مرحب بيه
والله وأشيله في عيوني
واثق جدا في الله دايما
هيرتب في الجي حياتي
ويخليني أحسن منهم
وهسامح لو يوم ظلمونى
وإن كان ع الحب اللي إديته
فأنا فزت بذاتي وخسروني
ــــــــــــــــــــــــــــــــــــــــــــــــــ ـــــــــــــــــــــــ
#تامرالنقيب
#خربشات_نقيبيه
23/2/2024
حرف استثنائي من شخص استثنائي
لجمـال حروفك رونق اخر .. مُبدع و مُتألق اخيّ تامر
أُحب قراءة جميع ما تكتبه
و اتشوق للمزيد دائمًا .
تُجيد نسج الحروف و الكلمـات
و تصف الشيء و تجعنا نشعر به
و كأننا نشعر الحالة !!
مُبدع دائمًا اخيّ تامر, و حُروفك من ذهب
دمت لنا و دام إبداعك يا راقيّ
و لا حرمنا الله من جديدك إبدًا
,
والله يعطيك الف عافيه .
لك
عضويتي 
إزاي خذلوك !!!!!!! #علافياله #تامرالنقيب .. سيجال
العرض العادي
