لعلكم تذكرون

دام نظر هادى الى الارض وكأن نور الايمان والحياء قد وجد طريقه الى قلبه، وبكى أحمد لبكاء صاحبه فكان رقيق القلب سريع الدمع، ونظر الى هادى الذى كان يريد ان يتكلم ... ولكن.. كأن لسانه محبوس يتكلم قلبه ويبكى قلبه قبل لسانه وعينيه ... متحسرا على أيام مضت فى سكرات الدنيا والغفله وماضٍ مليء بحمل ثقيل من ذنوب وآثام.
وقال هادى لصاحبه أحمد: الحمد لله الذى جعلك سببا فى أن أفقتنى مما أنا فيه، أنت متعرفش أنا كنت تايه قد ايه مفيش سعاده دايما مشاكل ومفيش راحه كنت بكدب على نفسى كثير وبعيش الوهم ولكن فى الحقيقه كان هو الهروب ....وسكت هادى
احمد: الحمد لله الذى أنار قلبك وربنا يثبتنا حتى نلقاه
هادى: ءامين
احمد: انت عارف ياهادى سورة الانسان ناس كثير بتقرأها ومش عارفه ان ديه سوره ربنا سماها باسمنا
سوره على اسمنا عشان نعرف اصلنا فالاصل فى الانسان العيب والنقصان والنسيان ولذا سماه الله انسان عشان يعرف العبد انه له رب له كل الجمال والجلال والكمال منزه عن العيوب والنقصان ..
تروح تسمع الايه اللى بعدها "إِنَّا خَلَقْنَا الْإِنْسَانَ مِنْ نُطْفَةٍ أَمْشَاجٍ نَبْتَلِيهِ فَجَعَلْنَاهُ سَمِيعًا بَصِيرًا"
يعنى انت اصلك نطفه حتة ميه شايف نفسك ليه وعامل لنفسك قيمه ليه وانت متسواش فتعرف اصلك وتعرف النعم اللى عليك سمع وبصر من نطفة بقيت سميع بصير ذو عقل ووجه جميل وتناسق فى الخلقه من الذى انعم عليك من الذى سواك وجملك واحسن خلقتك لو فقدت السمع ولا البصر مين اللى يقدر يرجعهولك لو رحت لجميع البشر محدش يقدر يعطيك ماتريد الا الله اسمع الايه ديه "قُلْ أَرَأَيْتُمْ إِنْ أَخَذَ اللَّهُ سَمْعَكُمْ وَأَبْصَارَكُمْ وَخَتَمَ عَلَى قُلُوبِكُمْ مَنْ إِلَهٌ غَيْرُ اللَّهِ يَأْتِيكُمْ بِهِ انْظُرْ كَيْفَ نُصَرِّفُ الْآيَاتِ ثُمَّ هُمْ يَصْدِفُونَ" شوف ربنا بينعم على الانسان قد ايه والواحد مننا ولا بيعتبر ولا بيتعظ ده نعمه واحده متساويش ملك الدنيا كله فى اثر عن هارون الرسيد انه دخل عليه احد العلماء وقال له لو اتمنع عنك شوية ميه صغيره شربة ماء تدفع نص ملكك لتشرب قال نعم قال لو حبست ولم تستطع اخراجها يعنى الميه لو اتحبست فى المخرج ولم تستطع التبول اتدفع نصف ملكك الباقى قال نعم ، فقال له تبا لملك لايساوى شربه وبوله عشان كده هارون الرشيد فهم الدرس كويس ووعرف نفسه وان النعم مغرقاه وملكه زائل فقال عند الموت " اللهم يا من لايزول ملكه ارحم من قد زال ملكه "
هادى: متأثرا ياااه دا موقف صعب ربنا يرحمه ويرحمنا
احمد : اللهم ءامين

هادى : ده احنا بعاد اوى من القرءان والتفكر فيه وفهم اسراره
احمد : طبعا ده بحر اسرار لاينفذ والتفكر ده عباده عظيمه اوى ، اه فكرتنى بموقف حصل معاى
هادى: موقف ايه
احمد : كنا فى فرح اخ وتكلمت عن ان اول مقاصد الزواج التوحيد وسكت وقلت من يجيب دليل حتى الاخوه استغربوا توحيد ايه ياعم فى الزواج
هادى : ها وبعدين
احمد: فى ايه فى سورة الذاريات نادر لما نوقف قصادها ونتفكر فيها رغم ان ربنا بيخاطبنا فيها بالتذكر قال تعالى "وَمِنْ كُلِّ شَيْءٍ خَلَقْنَا زَوْجَيْنِ لَعَلَّكُمْ تَذَكَّرُونَ" طيب ربنا عاوزنا نتذكر ايه ياترى سؤال لازم نتفكر فيه ، ايه رأيك انت ياعم هادى
هادى : بيفكر قول انت ياحمد ما انت عارفنى ابيض
احمد : لعلكم تذكرون ، يااه معناها عالى اوى ، ان الاصل فى الانسان الفرديه ولم يجعل له ربنا سعادة ولا هناء فى الفرديه حتى يعلم انه احد صمد منزه عن الند والشريك والصاحبة والولد وان كل كل المخلوقين الاصل فيهم الحاجه والنقصان وانه سبحانه له كل الكمال فلا يكون قصدك وتفكيرك وسعيك الا لله لذا تبعها " فَفِرُّوا إِلَى اللَّهِ"
هادى : ياه ، لا اله الا الله ، سبحانك يارب

احمد: باب معرفة الله ده واسع بحر لان ربنا عظيم وصفاته عظيمه ليس لها حد ولا عدد يعنى شوف مثلا ايات بسيطه فى عظمة وجلال الله " ومَا قَدَرُوا اللَّهَ حَقَّ قَدْرِهِ وَالْأَرْضُ جَمِيعًا قَبْضَتُهُ يَوْمَ الْقِيَامَةِ وَالسَّمَاوَاتُ مَطْوِيَّاتٌ بِيَمِينِهِ سُبْحَانَهُ وَتَعَالَى عَمَّا يُشْرِكُونَ "
ربنا عظيم وكبير ياهادى انت عارف يعنى ايه السماوات والارض وحجمهم بص كده للسما ء انت فاكر ان ديه هى السماء الدنيا
هادى : اما ل ايه
احمد: دى جزء من جزء فى مجرة درب التبانه اللى هيا الارض من ضمنها والمجموعه الشمسيه
ايه رأيك فى حجم الارض والشمس
هادى : كبير لدرجه متتخيلهاش طبعا
احمد: انت عارف المجره ديه فيها كام نجم زى الشمس كده واكبر
هادى: كام ?
أحمد: ما بين 200 الى 400 مليار نجم مش ده العجيب اصبر بس متندهش ده فيه غيرها ملايين المجرات ده كل بس فى السماء الاولى
هادى : سبحانك يارب ما اعظمك ، ده يعنى لسه غير الست سماوات التانيه ، ياه على العظمه
احمد: انت عارف السماوات والاراضين فى حجم الكرسى اللى هو مقدمة العرش كحلقه فى فلاه يعنى كأنك رميت دبله او ربع جنيه حديد فى الصحراء شوف المقارنه بقى والكرسى فى العرش الذى يستوى عليه ربنا استواء يليق بجلاله وليس كمثله شئ كحلقه فى فلاه

هادى : بيبص فى السماء مستغربا وعليه اثر الدهشه والخوف ، سبحانك يارب دى يعنى انا وانت هوا منسواش ذرة
احمد: يرد متأثرا ربنا من اسمائه العظيم الكبير سبحانه بيخليك تشوف الايات وتتعلم عشان تعرفه وتعرف قدره وعظمته وتعرف نفسك عشان كده لما تيجى تركع انت وبتصلى وتقول سبحان ربى العظيم حتحس بجد انك عبد صغيييير ذلييييل كسير ضعيف ، احمد ينظر الى الارض متأثرا وتقع عينه على الساعه وقد جاوزت الثانية عشر
ثم .. نكمل الحلقه القادمه

لا تنسى عبادة التفكــــــر
تفكّر في السماء والأرض وما بينهما ... تفكر في خلقتك وتكوينك
تفكر في أقدار الله
تفكر في قدرك وقدر الله جل في علاه