في الصبح بدري .. ومع صوت الديك اسمعه كانه عند اذني وامي فوق روسنا تنادي

قوموا يا سفان ابوكم يبغاكم ..

وين بها يمه ؟؟

قوموا ابوكم يبغاكم تسرحون راس العمير وتبشرون الركيب
عساس تذرون وتحرثون وتدمسون .

وانتي يمه ؟

انا بسوي لكم فال خبزه ومعرّق وسمن وشاهي وبلحقكم به
نتفاول عند شجرة العرعره قبل الظهيره ..

يمه وها الى متى وانحن في شقى الزراعه والحرث والحصاد ؟؟

يا ولديه مالنا غير البلاد نزرعها لين الله يفرجها من عنده .

قمنا والله معنا ولبسنا قد هي فوقنا من الليل وقد رقدنا بها .. ماكان عندنا غيرها ..

ثياب مهتريه والقلح فوقها كما المهلبيه http://www.alhebah.com/vb/images/smilies/biggrin.gif

يا يمه وين ابيه ؟

ابوكم في حراكم قد سرح قبلكم ..
ويبغاكم تحضّون قوام و معكم تاخذون من السفل السانيه وعود الحرث
والمصلبه والمدمس لاتنسونه ..


يمه ابشري ..

ترد وتقول : يا نا لويتكم يا سفانيه ..

واخذنا السواني واقتدناها معنا وعود المحراث فوق كتفي
والمصلبه والمدمس فوق اكتاف اخيه ..

ومشينا حافين لجهة العمير ..
ووصلنا فوق عند الركيب ..
والسماء ملبده بالغيوم ..
ونطلب الغيث من الله الكريم ..

بدينا نبّشر الركيب وذرينا القمح وبداء يحرث ابونا وانحن نقود له السواني ..
وبدت قصايد اثناء الحرث ومنها يا عمالي طال ابقاكم ..


وبعد ساعه او عليها نشوف امي مقبله ومعها الفال ..
وانتهينا من الحرث واجتمعنا تحت العرعره وفرشنا السفره ..

يا محلاها الجمعه مع ابونا وامنا وزادها لذة الفال من طبخ امنا ..
ومع الخبزه والمعرّق والسمن اكلناها ويا هنانا ويهنيكم بالهناء ..


وانتهى ذاك اليوم بشقاه وفاله وليتها كانت تدوم ايام ذاك الزمان ..
والله يرحم ابونا ويغفر له ويسكنه الفردوس الاعلى من الجنه
وينعم على امنا بالصحه والعافيه ..