شئ من الواقع احدى الاخوات كانت في زياره لي قبل شهر او اكثر بقليل لتحصل على بعض المعلومات في كيفية التعامل مع طفلها العنيد ووضحنه الها نقطه واحده واليوم الاخت جاءتنا في زياره اخرى لتطرح لنا بعض من مشاكل طفلها ، هذه الاخت اسمها الافتراضي (عفيفه)
عفيفه انسانه حبابه وطيوبه بس هي بيها مشكله انها عصبيه جدا يعني على اقل شئ يثير غضبها بس هي من اجتني ما اجت تبحث عن طرق شلون تتخلص من عصبيتها لان هي ما معترفه انها عصبيه وانما اجت تشتكي من طفلها (امير) لذلك راح انقللكم جزء من حوارنه اني والاخت عفيفه
عفيفه : ست اجيتج اليوم واريدج تحلين مشكلة ابني الشالع قلبي ومتعبني كولش
اني : تفضلي عزيزتي طرحي المشكله
عفيفه : ست ابني عصبي بس يصيح ويتذمر ويغلط عليه وحتى وصل بي الحد يمد ايده عليه ويضربني يعني تخيلي البارحه طلع للشارع اكله ليش تطلع يكلي بكيفي يعجبني وانتي شعليج بيه ، كلت لابوه عليه ضربه موته كتل كام يغلط ويصيح على ابوه وعليه ويكللنه اني ما احبكم اكرهكم انتم مو اهلي اني راح اعوفكم ، ست والله ممقصرين وياه ايباد وجبناله بلي فور وجبناله اله غرفه وحده يلعب بيها كلشي يطلب مدليلنه دلال بس هو ما عاجبه ولا شي ولا يغزر بعينه يكول اي اني كلشي ماشايف منكم ذاك ابن عمي اهله مدللينه دلال انتم شنو مسويلي ، ست لسانه طويل وهو بعده عمره ست سنوات اذا كبر شنو راح يسوي بينه ....!؟
اني : عزيزتي في بادئ الامر اود ان اسألك سؤال ..
شوكت اخر مره بستي طفلج وشوكت اخر مره زوجج باسه ؟
عفيفه : ست يعني صراحه زوجي دائما بالشغل قليل يبوسه يعني يجوز مره باليوم واني هم هو يجي يبوسني ويعتذر من يسوي غلط هو يجيني بس اني قليل اروحله
اني : طيب انتي هسه وزوجج خلوا نفسكم بالموقف شنو شعوركم اذا محد بينكم يتودد للثاني يعني شنو شعورج اذا زوجج ما يسمعج كلام الحب او ما يتغزل بيج او من ينام ينطيج ظهره وما يحجي وياج ( وهو زوجج ايضا شنو شعوره اذا انتي تتصرفين وياه هالشكل) ؟
عفيفه : اكيد اضوج وما اتحمل وانقهر وزوجي ايضا ما يتحمل اتصرف معاه هالشكل
اني : طيب اذا انتي وزوجج ناس كبار وعاقلين وفاهمين وبهذا عمركم وتبحثون عن الحب بينكم والعاطفه لعد كيف بالطفل الصغير اللي مشاعره وعواطفه هي المسيطره عليه ؟
عفيفه : فعلا صحيح اي والله
اني : طيب اسألك سؤال اخر اذا زوجج ما يسمعج كلمات حب انتي بعد اطيعينه تلبين طلباته ؟
عفيفه : لا والله من يطلب شي ما اسوي واكول بكلبي مايستاهل وحتى ابقه دائماً اجرحه بكلامي
اني : لذلك اهم حاجه لازم توفريها للطفل هو الاشباع العاطفي والحب يعني يوميه تبوسي وتحضني وتسمعي الكلمات الجميله (ماما حبيبي عمري نور عيوني احبك اموت عليك فرحة قلبي ) وكذلك الاب لازم يتعامل بنفس الطريقه هنا راح تكسبين قلب طفلج وتسيطرين على مشاعره وايضا راح يكون مطيع الج والقضيه الاهم من هذا كله ان يكون الحب غير مشروط يعني من تكليله احبك لازم تعبرين عن ان حبج اله مو بشرط يعني لا تكليله ( اذا تسمع كلامي احبك واذا ماتسمع كلامي ما احبك !!) هذا الاسلوب غير صحيح لان الطفل راح يشعر انه مهدد وماراح يشعر بالاستقرار بل بالخوف والتوتر لذلك عبري عن حبج اله حتى وهو كان غلطان (ماما اني حبك حتى وان كنت غلطان احبك ، اذا سويت الصح احبك واذا سويت الغلط ابقه احبك )
عفيفه : لعد شلون اخلي يحس بغلطه ؟
اني : انتي شلون تتعاملين معاه من يغلط ؟
عفيفه : اصيح عليه واعصب واضربه
اني : عزيزتي تقبلين من انتي تغلطين يجي واحد يتعامل وياج بالعصبيه والصياح والغلط ؟
عفيفه : هااا لا والله ما اقبل
اني : واطفالنا ايضا مايقبلون نعاملهم بهالطريقه لذلك هو متعلم منج انتي هاي السلوكيات اذا هو عصبي ويصيح معناها انتي عصبيه واذا يغلط معناها انتي تغلطين لذلك غيري تصرفاتج بالاول وهو راح يتغير .. اما اذا غلط كوليله ( ماما اني احبك انت حبيبي بس هذا تصرفك السويته مو صحيح لذلك راح اعاقبلك والعقوبه تكون ماكو طلعه للحديقه اليوم ) او اختاري اي شي يحبه طفلج وكليله انت معاقب ومحروم من هذا الشي لانك تصرفت كذا
ورجعي اكدي عليه اني عاقبتك لاني احبك وابقه احبك واريدك تتعلم الصح وتعرف حجم خطأك ..
عفيفه : جدا ممنونه منكم ست تعلمت نقطه تربويه جديده من حضرتك راح اطبقها مع طفلي وان شاء الله اجي الك بجلسه اخرى واتعلم امور جديده
اني : الشكر لله عزيزتي وتدللون بالخدمه