منتدى رواية عشق - كفاية ما كتبته من وهم عمري على الجدران

خسارة كل شي اقفى ومات الورد والريحان
وصار الجرح الأول في الحياة يشابه الثاني

خسارة كل غيمة في السما ما تروي العطشان
خسارة يالغيوم الصفر وش جبتي علا شاني

انا من يوم ميلادي وانا عارف انا الخسران
ولكن حكمة الله في الحياة ارضى بما جاني

انا اللي جيت للدنيا كذا ما جيتها ولهان
لقيت اني على جمر السنين الحمر وحداني

انا والهم والوحده على طول السنين اخوان
على الحلوة وعلى المرة على صوتي على الحاني

انا جرحي حفظته في دروج السر والكتمان
وفجر داخلي عالم يحاول يقطع لساني

انا اللي كان صدري للخيول الجامحه ميدان
وانا اللي طيبتي كانت شعور للهمس وجداني

انا اللي كنت غافل لين جتني طعنة الشريان
نزفت العمر كله لين ضاعت قوة ايماني

ترى طعنة قريبك لا وصلت ياشينها بركان
وانا اللي طاح صدري في يدي وانهزت اغصاني

تغير كل شي عندي وانعدمت الألوان
وصار اللون الاسود من هنا اسمي وعنواني

انا المجرم وانا اللي ما قتلت بداخلي انسان
قتلت الحب والطيبة بعد ما شفت نقصاني

انا الحاكم وانا الظالم وانا عالم من الحرمان
ومن يدخل محيط الحزن يبشر بي ويلقاني

انا اللي خافقي مسجون واحساسي هو السجان
وضاع العمر مني ما قدرت اقبض على الجاني

انا عالم غريب وعالمي ما يسكن النسيان
عجزت انسى جروحي والزمن يسعى لنسياني

كفاية ما كتبته من وهم عمري على الجدران
كتبت آخر قصيدة بالدم فـي صدر حرماني