.غلطان ياللي قلت ذا الحب تخريف
لا صار عشقي طب روحي ودواها
.
هي بنت أنا من حبها مشهر السيف
عن من نهاني عن مشارف هواها
.
في وصفها ما قلت كذب ٍ ولا زيف
الطيب فيها مثل طفل بحشاها
.
عبيرها لي كنّه البن للكيف
لا والله الا الكيف يتبع خطاها
.
أحبها والحب من دون توصيف
يسطي على قلوب البشر ويهناها
.
أحبها من دون رخصه وتعريف
لا صار حبّي حايم ٍ في سماها
.
ياللي تقول الحب علم ٍ وتثقيف
تعال شفني في جنوني معاها
.
والله ما أفهم في علوم المواليف
لكن قلبي جادها يوم جاها
.
أحبّها وإن قيل بالعلم تحريف
خذها أكيده لجل أبيّن غلاها
.
هذا وأنا ما شفت غير الذي شيف
وش عاد لوّي شفت باقي حلاها