هــو الوحيــد اللــي عــلى مــا تمــنيت

عندي أمل مهما ولهت وتباطيت
إن قلبي اقرب له من اقرب ظلاله
.
عشرة وفا .. ما بار فيني ولا ريت
منه سوى رقه وعطف ونباله
.
غايب وخلى بالحشا ديرة و بيت
هذي فناجيله .. وهذي دلاله
.
كن فقد صوته كل ما اصبحت وامسيت
شايب وفاقد شوفة اغلى عياله
.
لا يحسبني كل ما غاب .. سجيت
ما دام قلبي يوم حبه وفا له
.
مهما فعل .. مهما حصل .. ما تخليت
عنه ولا عن حب رجوى وصاله
.
خفت اني مخطي في حقوقه وزليت
وفليت كل ارشيف عمري قباله
.
اشوف وش سوى وانا ويش سويت
هذاك هو قفى بقلبي وشاله
.
ما طاعني عن العرب يوم صديت
يحرجني اللي ما يخبي سؤاله
.
احد : يقول اني من الحب مليت
واحد : يقول اني من الحب داله
.
وانا من الدنيا واهلها تغانيت
باللي سكن في وسط جوفي لحاله
.
حفظت سره في ضلوعي ولا افضيت
ما للبشر عازه بقلبي وحاله
.
يمر بالي بالثواني ويا ليت
ادري .. انا كم مره امر باله
.
ما ظتني ينسى الغلا والتناهيت
ولقاه وعيوني تناظر جماله
.
ولا قلت شعري له تعديت كم بيت
وغدا كذا يضحك علي بالعماله
.
لا يلومني لا قمت اسج .. وتخطريت
وسبهت ف عيونه و حبات خاله
.
لو ما هو بغير العرب ما تجريت
لكنه بكل الوصايف لحاله
.
هو الوحيد اللي على ما تمنيت
ما جاز لي غيره ولا ابغي بداله
.
اي والله اني ( مشتحن له ) وعانيت
خلوه يعذبني .. تراني حلاله
.
الظاهر اني قبل اعرفه ما حبيت
عنده حكي .. ما فيه مخلوق قاله
.
حبه جنون وكل ما اشتاق لي جيت
اقطع دروب الشوق .. فدوة دلاله
.
اليا دعاني من صميمه ولبيت
ضم العروق وقال لي : كلها له
.
لمواصله في كل حزه مواقيت
وما عاد جات بنفس وقته رساله
.
بعده يعومسني وانا ما تناسيت
عندي امل اني باشوف اتصاله