يا وقت عيد الذكريات القديمه

يا وقت عيد الذكريات القديمه
بوقف ايامي على حد ذكراي

يا وقت خلف ضلوع صدري يتيمه
وايام عمري تحتري مني الجاي

وأنا الى هالحين في صدر غيمه
تمطر تناهيتي وتسقي بقاياي

والقاع مابلت ثراياه ديمه
اضحت عطش قيعان صمتي بدنياي

واليا ارتميت وطحت بيدين ريمه
خلوني اسلى عندها داي ودواي

احبها والحب ماهو جريمه
بس الجريمه تنقتل روح جواي

طفله حشاها في دفاه استهيمه
والوذ عن برد الهجر واعقد الراي

والقى الهجير اللي ذبحني صريمه
بيدينها يصبح سواليف حكاي

والقى الجروح اللي بصدري مقيمه
مثل مهي الا انها تطلب رضاي

عليك يا عودٍ موالف نسيمه
من وين ماتهب النسانيس غواي

يدعي خضاره لانحنى يستقيمه
على يدين مداعب بصمته الناي