يا صاحبي لا تزعجك دمعة العين

يا صاحبي لا تزعجك دمعة العين
بعض الدموع تعقب القلب راحه

اليا نزلت من ضيقة فالشرايين
يعود للقلب الحزين انشراحه

بلاك من دمع محدر على وين
ماله بساحات الرجوله مساحه

اما نزل لعيون ساره ودارين
والا بعد فوز الهلال ونجاحه

ما يطرح دموع الرجل غير ثنتين
ثنتين فيهن دمعته مستباحه

الاوله لا من غدا الليل ليلين
في ساعة كل هجع في مراحه

لا فز من نومه زبون الامرين
واعلن مع الرحمن ساعة صراحه

عده سجين وقصته عقب يومين
لكن سبقه العفو واطلق سراحه

والثانيه لا فارق القلب غالين
فرقا مهي فرقا السفر والسياحه

فرقا الكفن والمقبرة والمعزين
فرقا سؤال المغفرة والاباحه

في غيرهن يا صاحبي ريح العين
واستنقص الدنيا وتزداد راحه