سالفة صمت
سلام الله على الدرب الطويل بسكة سنيني
سلامٍ يعتق الصمت الدفين و يكسر ابوابه
ويفتح صفحة الحزن القديم ويكتب بطيني
اغاني للأمل لو دمع عيني بلل كتابه
ابانثر ملحها . وش فادني صبرٍ كفر فيني ؟
واصد الكبريا ما دامها عميا وكذابه
و لو قالوا الصدر خزنة مواجع قلت يمديني
اقول الا المواجع لابقت بالصدر تغتابه
ولكن لي متى هذا الأرق و الليل يسريني
حرمني من صباحي و العوض في حالك ثيابه
تعبت بكل مايعني الكلام وما يعزيني
لاجار الجوع تصطك الظروس وتعوي ذيابه
تعبت اعانده ثم يتكاثر بيني و بيني
واهيجن لالفى : حيا السهر . ياحي ماجابه
ادور للقلم عذرٍ سمين يصافح يديني
على شوق الدفاتر للحبر او لحظة كتابه
و اهمش واقعي كن الألم ماهوب يعنيني
ابانسى اني ادور بفكرته و ادون اسرابه
و اسميه الهروب من الجمر والنار تكويني
اصور للبشر وانا اشتعل كيف اتدفى به
عشان اليا لمحني جاهلٍ و الدمع في عيني
تغره ضحكتي ولا الدموع الزرق تتشابه
اخبي في عروقي ما ذبحني من سكاكيني
مدام الدم دمي فالقريب احن واولى به
دخيلك ياجروحي طالبك مره تهجيني
وشوفي لا كتبتك كيف انا كاتبك جذابه
و دلوعة قصيدي واكذبه واصدق مخاويني
واقسى ما نزفته وافتخرت بطعنة حرابه
دخيلك لا نثرتك من قهر تكفين قهويني
ولا باهز فنجال التعب و احرم عتابه
عزمت احياك نورٍ لو سوادك مايقديني
وذكرى للحبايب والزمن لاكشر انيابه
بـاودّع كل دربٍ لادنيته كان يقصيني
عسى القى لي طريقٍ خطوتي ماتنكر ترابه
وابلغ سالفة همي الطويل بسكة سنيني
سلامٍ يعتق الصمت الطويل ويكسر ابوابه
شكرا علـّۓ. الاهداء ياحاء 
|
عضويتي 
العرض الشجري
