والد ياسمين صبري ينتقدها للمرة الثانية: تدعي الفقر وتكذب لتشويه أبوها "منك لله"

عاد الطبيب أشرف صبري لانتقاد ابنته النجمة ياسمين صبري، بعد تصريحاتها الأخير عبر "سبيس تويتر" التي قالت فيها إنها دخلت مدرسة حكومية وكان مصروفها القليل بنفد سريعا فتذهب للمدرسة والنادي سيرا على الأقدام، ورد أشرف بصورة لمدرسة ياسمين الخاصة، مع تعليق غاضب طالبها فيه بالتوقف عن تشويهه وقلب الحقائق متعجبا من إصرارها على ادعاء الفقر رغم أن ملابسها كانت تأتي سنويا من باريس.
أشرف صبري نشر صورة للمدرسة العريقة بمحافظة الإسكندرية وعلق عبر حسابه بموقع الفيس بوك قائلا:دي المدرسة اللي اتخرجت منها بناتي اللي واحدة منهم بتدعي انها كانت في مدارس عربي وعاشت حياة بائسة فقيرة وانها وصلت بمجهودها!
أضاف: هو الكدب في حد يوصل للدرجة دي؟ انا افهم الكدب لما تبقي غلبانة وتكدبي تقول انا من عيلة كبيرة ومدارس اجنبية وعيشت في سراية وبابي كان وزير وهو بيشتغل عامل! يبقي كذب له مبرر! لكن ان واحدة اتولدت لها شغالة فليبينية بتلبس من باريس لاني كنت باجيب لها لبسها من هناك ودخلت مدرسة ال EGC ارقي مدارس اسكندرية في وقتها وعاشت في فيلا بحمام سباحة وصالة جيم ولها غرفة خاصة بحمامها.

وكرر صبري شكواها من ضعف تحصيل ابنته الدراسي وعدم رغبتها في استكمال تعليمها قائلا: كانت بليدة وطلعت روحي ويا دوب تنجح بالعافية بخمسن في المية وكانت بتروح الكلية بالعافية واصحيها الصبح بالساعة عشان تروح الكلية وتترفد في السنة مرتين وعميدة كلية اعلام بيروت موجودة وتشهد كنت اروح دايما اقدم اعتذارات وشهادات طبية عشان ترجع الكلية وشهاداتها عندي كلها كحك وابوها دكتور.

تابع قائلا: تطلع تدعي انها عاشت حياة بائسة وغلبانة وبتكمل باقي الشهر من غير فلوس! ايه الكدب والفيلم المتخلف ده انتي عايشة دور تمثيل ورثاه من جد والدتك سيد سليمان. وبتكدبي ليه؟. حتاخدي نيشان يعني علي خيبتك وفقرك وصلتي وبقيتي حاجة؟ انتي بالنسبة لابوكي حتة عيلة مش فاهمة بتعملي ايه غير انك بتشوهي اللي رباكي عشان الناس تسأفلك.
واختتم رسالته الغاضبة بقوله: حتي اخوكي بهدلتيه اللي طول عمره جنبك وبيجي من اخر الدنيا عشانك! ياشيخة بطلي اللي انتي فيه ده وحسبي الله ونعم الوكيل فيكي. بطلي تجيبي سيرة عيلتك ابوكي اللي رباكي منك لله.

يذكر أن ياسمين صبري احتلت ترند تويتر صباح يوم الثلاثاء الماضي بعدما شاركت لأول مرة في بث مباشر عبر موقع تويتر لتقديم خلاصة خبرتها في سبل تحقيق النجاح، وأكدت أن كل ما حققته من انجازات حتى الآن سبق وأن حلمت به في طفولتها، وقالت إن ظروفها الصعبة في الطفولة لم تمنعها من "الحلم"، كما إنها لم تستسلم لإحباطات أصحاب الطاقة السلبية.

ياسمين صبري قدمت أول محاضرة فعلية عن التنمية البشرية مع تطبيق مقولاتها على حياتها الشخصية، لتؤكد أن التغريدات المنشورة عبر حسابها بموقع تويتر على مدار العام الماضي ليست مجرد اقتباسات منقولة، ولكنها حصاد دراسة جادة، وقالت في جلسة حوارية عبر خاصية "سبيس" على موقع "تويتر"، أدارها الكاتب تامر عبده أمين: أنا كنت عايشة في إسكندرية في أسرة طبقة متوسطة، ومصروفي كان قليل جدا ولو خلص بكمل الشهر مع نفسي، وكنت عايشة في بيت جدي وجدتي، وفي مرحلة من حياتي كنت في مدرسة حكومية.
تابعت: كنت بلعب سباحة وكل يوم بروح التمرين مشي، وأنا ماشية كنت بتخيل إني هيبقى عندي أحلى حاجة في الدنيا، كنت بتخيل حاجة هتحصلي في الحقيقة، وإن هيبقى عندي أحلى جزم وشنط وبيت وعربية، وكل حاجة أحلى، ومكنش في أي حاجة تدل إني هحقق ده، بس كنت بشعر إني أستحق وكنت بحب نفسي، مكنتش أعرف إن ده جزء من قانون الجذب، بعد شوية حققت جزء من أحلامي، وبعده جزء، وكل شوية أحلامي بتكبر.

أضافت: الإنسان هو اللي بيصنع مصيره والعالم والواقع اللي عايش فيه، وعشان كده إحنا بنتحاسب في الآخرة، إحنا مخيرين، الإنسان كل يوم بيبقى عنده اختيارات، والكون عبارة عن مينيو كبير، وانت اللي بتختار لك ولا حد يفرض عليك حاجة، فكر بنفسك واحسبها وتوكل على الله واختار، ولما تطلب من ربنا أطلب أحسن حاجة، وهتاخد أحسن حاجة، وكرم ربنا لا ينتهي، مفيش حنفية ويتقالك كفاية كده، أنا لا أؤمن بموضوع 24 قيراط وإن ليك عدد معين، أنت لو عايز الدنيا هتاخدها.

أكدت ياسمين أن ما يجده الانسان في حياته هو ما سعى بالفعل لتحقيقه، وقالت: نستحق كل حاجة حلوة في الدنيا، لازم نسعى ونحلم، لأن اللي مبيحلمش ده شخص ميت.