مصطفى يبدع فى تحويل قطع الخردة إلى مجسمات صغيرة

قد يكون من الصعب أن نتخيل أن تتحول قطع الخردة القديمة، والتى ربما نجدها حولنا بكثرة ولا نعيرها أى اهتمام، إلى قطع فنية تنبض بالحياة، نستطيع استخدامها كتحف فنية.
مصطفى أمين شاب استطاع أن يرى الجمال فى قطع الخردة المتناثرة حوله، ليحولها إلى قطع فنية، ترغب فى اقتنائها والنظر إلى دقة تفاصيلها، حتى أطلق عليه البعض "ساحر الخردة".
مصطفى يبلغ من العمر 35 عاما، من محافظة الإسكندرية، حاصل على دبلوم صنايع، قسم سيارات، وهو صاحب أحد المحلات للصيانة الكهربائية، وهو ما دفعه لحب الخردة، وبدأ فى تحويلها لقطع فنية منذ شهر أكتوبر من العام الماضى بإمكانيات ضعيفة جدا، ويقول لليوم السابع: بدأت ببعض المسامير وبعدها بعض التروس، وجمعت ماكينة لحام من الخردة التى أملكها حتى تمكنت من شراء واحدة جديدة".
وعن الوقت الذى يستغرقه مصطفى فى تحويل الخردة إلى مجسمات صغيرة وقطع صغيرة قال "حسب الحجم وحسب الشكل، فى حاجات ممكن فى تنفيذها تأخد 3 أيام، والأهم من التنفيذ بيكون الفكرة نفسها، يعنى أنا صممت أبو الهول والأهرامات فى 3 أيام، لكن الفكرة نفسها أخدت بردو 3 أو 4 أيام، التنفيذ دائما مش بياخد وقت، الأهم الفكرة دائما، يعنى مثلا أنا حاليا عاوز أعمل مجسم كبير أو عملاق، بحاول أفكر أزاى هجمعه وطريقته هتبقى أزاى، فالمهم دائما هى الفكرة".

وتابع "أنا فى الأول بفكر هعمل إيه، وبعد كده ببدأ أرسمه، وأفكر حجمه هيبقى قد إيه، والإمكانيات اللى معايا هتبقى ايه، كل ده بياخد منى أيام، وبعد التجميع التنفيذ بياخد من يوم ل 3 أيام حسب الحجم والشكل".
وعن المعدات التى يستخدمها قال مصطفى "بستخدم معدات يدوية زى الشاكوش وفرشاة ومفكات ومفاتيح، وماكينة كهرباء للحام، وصاروخ، وشنيور، وغيرها من أدوات الخردة"
وبشأن الخردة وكيفية إيجادها، قال مصطفى "فى حاجات بتتبقى من شغلى، وفى حاجات ببقى عاوزها بمواصفات معينة، بدور عليها وأجيبها، وبروح لأماكن بيع الخردة أو الورش وبدور على اللى بحتاجه"