قصة إللي عنده مخ يجخ

رغم ان جدّي كان ذو عين زايغة ..ونسونجي ، وتروح علومه وطي اذا السالفة فيها حرمة
لكنه كان شديد الحرص غفرالله ..
كان دائم يردد قلبي مثل قبري ما يشيل اثنين !
ذات مرة كنا جلوس في حديقة قصره ..وكان زارع سدرة في وسط الفناء .
وكانت سميرة توفيق في التلفيزون تغني وتغمز غمزتها الشهيرة ..وكان جدّي فاك خشته ومفهي في الشاشة ..لم يشعر بجدتي وضحى وهي تسولف معه وتمد له فنجان القهوة ..يقالها تقهويه ..
ياحميدان سم ..يابو مناحي تقهو ..ياتاج راسي مد يدك ..!
وجدي الله يرحمه مو يمها ..
وضعت الفنجان عند ركبته والتفت الى التلفاز لتجد سميرة توفيق تغمز ..صاحت جدتي وقالت طلقني !
فزّ جدي وانتبه انه جاب العيد ..
قال : فديت الزعلانين أنا ..وه بس على الكبير اذا تدلع ..وه ع الحلوين اللي يتغنجون ..ويح قلبي ياعصابة راسي ، أتضنين بي ضن السوء ؟
كان جدي الله يغفر له شديد الحماسة ..وع طول يدخل فصحى ومسلسل تاريخي اذا اشتد النقاش ..
قالت جدتي : لي ساعة اسولف معك واقهويك وانت راز خشتك قدام هالماتستحي على وجهها ..وين اهلها عنها ..وبدأت الديباجة !
فقال جدي :
تؤبرني وضحى لما تغار ياناس ..كان يناظرني ويقول لي هالكلام ..
والله ياوضحى انتي عصابة راسي ..وأول حب ، وأخر حب ..ما سمعتي قصيدة راشد بن جعيثن " والقلب ما يسكنه شخصين ، واحد ويكفي تعذيبه " .؟
قالت جدتي الا اللي غنتها المطربة " موضي الشمراني " في زواج سويرة
قال جدي : أهواك يا ناعس الطرفين ،وغيرك من الناس مالي به ..!
قامت جدتي تطق اصبع ورقبة وتقول : عذبتني .. بالهوى يازين ، وتعذيب الأحباب ..راضي به ، تلعب بقلبي هبوب البين ، ويبيع حبك ويشري به !
دخلت جو جدتي !
قمت من عندهم مابي أخرب جووهم ..!
رجعت عقب ساعة لقيت جدي يتفرج على مسلسل مكسيكي وفيه بنيات حلوات ..ولازق في الشاشة .
نزعت الفيش من الكهرب ..وجلست .
انفجع يحسبني جدتي ..
قلت له ياجدي همّاك قبل شوي تتفلسف على العجيّز ومسوي فيها جاك وهي روز ومسوية قيس وليلى ..خليتها تروح تنام وقمت تتفرج ؟
قال : لا تقول هيك ياهنري ..ابداً لا تشك في جدّك ..ترى قثلبي مثل قبري ما يدخله اثنين !
لكن القلب خضر ..ولابد من هالحركات
قلت ياجدي تدري مثل شو ؟
قال شو تؤبر البي انتا التاني
قلت قلبي مثل سريري ..اذا تعبت أتوسده وانام
قال : تالله انك حفيدي حق وحقيقي ..عيش حياتك نعنبو جدّك ..عيشها بالطول والعرض