أيام الأسبوع عند أهل بغداد

چانت أكو عادات وتقاليد مرتبطة بأيام الأسبوع يمارسوها العراقيين والبغداديين توارثت عدهم جيل من بعد جيل ، منها باقية ومنها راحت وأخذت أهلها الطيبين وياها ، أيام كانت عالفطرة غالبيتنه عايشيها وشايفيها وبعدها محفورة حفر بالذاكرة، راح ناخذها بالسره .

١- يوم السبت .
چان يوم ثگيل لان بداية دوام ، من چانوا الناس صدگ رايحين يداومون ويحللون خبزتهم ، لكن وره الظهر راح يختلف هذا اليوم، كون أغلب أهل بغداد يروحون يوم السبت يتباركون بزيارة الإمام موسى الكاظم ، من تروح قبل تزور( أبو طلبه ) تلگه هناك السني والشيعي ، تحظر الصلاة وتسمع الأدعية وتشوف النسوان توزع مراد( حلال مشاكل ) ، وتشوف الناس البايتين الجايين من المحافظات گاعدين يطبخون وياكلون وملتمين بالصحن، ولازم من تطلع من الإمام تروح تزور سوك الاستربادي وسوك الذهب وسوك المسگف واذا أيام شته لازم ترجع وبيدك حلاوة الدهين .

٢- يوم الأحد .
هذا اليوم تشوف بيه هواية أفراح، لأن بهذا اليوم مراسيم الحنة اللي تسبق ليلة العرس بيوم الثنين، لأن المتعارف عليه عند العراقيين من باب البركة يكون الزواج عدهم يوم الأثنين ويوم الخميس ، أيضاً يوم الأحد يوم مبارك عند المسيحيين ، تشوف المسيحيين مبدلين والبنات حاطين حجاب على روسهم وملتمين باب الكنيسة ،لأن هذا اليوم هو يوم الصلاة ولحد الأن صوت الناقوس يرن بأذانه يعلن بدء مراسيم الصلاة ، چنه نحترم الواگفين ونسلم عليهم ويردون علينه السلام ونمر من يمهم مرور الكرام .

٣- يوم الأثنين .
يوم أعراس ويوم خفيف، ويمكن چان عطلة الحلاقين ، يوم الاثنين يوم مبارك مثل يوم الخميس تلگه أكو ناس تصوم بيه، وتلگه ناس يوزعون بي ثواب على أرواح موتاهم، ونفس الشي تتكرر هذه العادات يوم الخميس من باب البركة .
٤- يوم الثلاثاء .
يوم عادي ويوم ثگيل بطبيعته ، بس چان بيه شي واحد حلو وهو سوق الثلاثاء چان على أسمه ، وأتصور هو يوم يشعر بيه الأخرين يوم منحوس ، ولهذا ما چان تصير بيه أي مناسبات .

٥- يوم الأربعاء .
بهذا اليوم چانت الناس تروح تزور مقام الخضر بالكرخ ليلة الاربعاء ، يروحون يعلگون شموع ويطوفوهن بالشط بنية طلب المراد، چان مقام الخضر ملتقى للعوائل قبل ، والأحلى مابيه چانت ركبة البلم من ياخذك ويفرك بالشط بالليل وأنت تشوف الأضوية الحمر والخضر والصفر عالصوبين معكوسة بنهر دجلة، تاخذك الأمنيات والراحة النفسية وأنت تشتم ريحة الشط ولا أطيب ريحة بالكون .
يوم الأربعاء چانوا البغداديين ياكلون سمچ ، موروث شعبي يگولون يكثّر الرزق ، وهم يتكرر بهذا اليوم مراسيم الفرح والحنة باعتبار الليلة حنته وباچر يزفونه

٦- يوم الخميس .
عيد ميلاد إبليس هههههههه يوم الخميس أنيس ودعوته ماتخيس ، يوم الأعراس والأفراح ببيوت العراقيين ، يوم الطلعة والمواعيد والسهر كلها چانت بيوم الخميس ، يوم خفيف ومحبوب وتكثر بيه هواية مناسبات حتى الشوارع تزدحم بيوم الخميس ، المحلات الأسواق النوادي كلها عامره بأهلها بهذا اليوم ، وتبقه بغداد منوره والحركة مستمرة لساعات متأخرة من الليل بإعتبار ثاني يوم عطلة وچان هذا اليوم يكثرون بيه زوار سيد أدريس بالكرادة ، يوم بركة ويوم صيام ويوم ثواب الكل يتفائل بيه .

٧- يوم الجمعة .
يوم اللمه والعطلة ، من چانت العطلة عطلة وچانت الها فرحة، يوم الجمعة يوم السفرات ، ناس تروح لبلد للسيد محمّد ، وناس تقصد سامره تروح تزور الإمام علي الهادي ، وناس تروح لسد الصدور بديالى ،

وناس تروح لسلمان باك ، وناس تروح لأثار عگرگوف ، وناس تروح تتغده مسگوف بالگريعات ، بهذا اليوم العراقيين يسيرون على أقاربهم ، تلگه بيوتهم مثل المضايف ،الجاي متلگينه والرايح مودعينه،

يوم الجمعة يوم الأكله المميزة ببيوت العراقيين ، أمهاتنه المعدلات يگعدن من الصبح يسوون باچه لو سمچ لو دولمه لو مقلوبة .
يوم الجمعة هو يوم الصلاة ، چانوا الناس يغسلون ويتعطرون ويلبسون دشاديشهم البيضه وعرقچيناتهم ويروحون للمساجد، من چانت المساجد عامره وتشم بيها ريحة الصالحين ، من چانت المنابر تعلمك عالحلال والحرام وتدعوا للمحبة ، من چانوا أهل الدين وجوهم تشع نور وإيمان ، وجوه باسمه وحلوة تحس بيهم صدك من أهل الله .

ومن طقوس يوم الجمعة چانت العوائل العراقية تروح تزور ضريح الشيخ عبد القادر لان بهذا اليوم يسوون بيه ذكر ويوزعون خيرات ابو صالح ، وأكو ناس تروح تزور الإمام أبو حنيفة وحلاوة الروحه هناك من تطلع وتتعشه بمطعم ابو عرب عالشارع وتشوف الناس شلون روشه والسيارات والاضوية وقبلها صوت المأذن تكبر للصلاة ، ولازم تتمشه بشوارع الاعظمية وتفوت بشارع عمر بن عبد العزيز، الله ياطيبة أهلها .
ونتذكر من عادات يوم الجمعة من چنه صغار چانت أمهاتنه لازم تسبحنه بيوم الجمعة ، لأن ثاني يوم دوام مدرسة، وكثير من الأمور اللي تحن الها الذاكرة چانت بهذه الأيام السبعة .

أيام چنه لا نسمع بيها طائفية ولا نشوف قتل، أيام چان يتقاسم بيها السني والشيعي والمسيحي والصابئي والأزيدي والكوردي فرحته ، أيام چانت بيها السمه زرگه صافية وحلوة ، أيام چانت ريحة الأشجار والقداح والرازقي والشبوي تملي شوارع المحلة ..
أيام أسبوعك يارب بعدها ، أشجارك بعدها، سماك بعدها ، بس ليش غيرت بشرها !!؟؟
إلهي تعبنه ، إلهي رد فرحتنه، صرنه غربه أبلدنه، إلهي اشتاقينه لوطنه اللمة أهلنه ، أشتاقينه لرحمتك يارب ، يارب أرحمنه ، ولا ترحم اللي فرق شملنه .
هيچ چنه.....

-














../
شُكرًا لك وَ لجمَال الطرح
دمتِ بخير يَ ألق.

سلمت الأيادي ..
ويعطيك العافية لـ جمال الآنتقاء
لروحك جنائن الورد .

يعطِـــيكْ العَآفيَـــةْ..
عَلَـــىْ روْعـــَــةْ طرْحِـــكْ’..
بإآنْتظَـــآرْ الَمزيِــدْ منْ إبدَآعِكْ ..
لــكْ ودّيْ وَأكآليلَ ورْديْ

اجد الابداع والتواصل الجميل
في اختيارك الرائع
لك مني باقات منى الورود

كل الشكر على طرحك الرآئع
وفي انتظار ابداعك القادم بكل شوق
لك وافر التقدير
تقبل مروري المتواضع