الورد شوك لكن الشوك ما يبان

ياناس أنا مالي ومال أكثر الناس
لحدٍ يسب فلان أو يمدح فلان
عندي عقل والعقل ميزان وقياس
وعندي عيون تشوف والشوف برهان
خلوا سوالفكم على داعي وساس
والا بلاش نتوه في صورة إنسان
محاولة تغيير الأفكار : وسواس
ومحاولة تطوير الأفكار: إحسان
والكره : يعمي ويجلب الظلم والباس
والحب : يعمي وما يشوف أي نقصان
لذلك ( الإنصاف ) هو اصدق احساس
واعدل حكم بين البشر طول الأزمان
( الزير ) ماأستحقر أحد كثر جساس
لكن شهد له بعد ما صار له شأن
نوب تظن الماء مهو داخل الكاس
ولحظة تشيل الكأس تلقاه مليان
وماهوب كل الورد ناعم وحساس
بعضه مشوك لكن الشوك ما يبان
ولو الشجر يدري بما ينوي ( الفاس )
ما أسقا الجذور اللي تجيبله الاغضان
ومن عقبها خلا الأغصان يباس
ومنها يجي للفاس ( مقبض ) ولا كان
وختامها بيتين ما بين الأقواس
وصح الله لساني وصح الله لسان
( قائل مثل : من عاش بين العرب رأس
يستحمل الصكات ويعيش وجعان )
( وخلوني أكمل حياتي مع الناس
على حسن ظن وعلى مبدأ الإحسان )