أبطيت عني .. والغلا زادني شوق

أبطيت عني .. والغلا زادني شوق
شوق التلاقي .. من بعد مدة غياب ..
.
بيني وبين الوصل .. لاحق وملحوق
سلم الحبايب .. مايبي غيبة أحباب ..
.
أخلج خلاج النوق .. لاماتت النوق
وأعوي .. عوى ذيب رقى فوق مرقاب ..
.
غنيت لك .. مع داعي الشوق طاروق
أغلب كلام الشوق .. للوصل طلاب ..
.
دامك بغيت البعد.. أنا أرجوك برفوق
علل غيابك ؟ .. لاتفارق بلا أسباب ..
.
ترا العمر مره ليا غبت .. مطفوق
طعم السعاده .. مايعوض بالاتعاب ..
.
زود على جرحي.. بعد جتني افتوق
جرح الغياب .. اللي كشر وجهه الناب ..
.
صعبه علي .. اذوق حزنك وانا أذوق
طعم المفارق .. والحزن معك ماغاب ..
.
شفني على وضعك .. ترى حيل مخنوق
أرجوك ..ترجع خاطري منك ماطاب ..
.
تعبت أشوفك .. في دجى ليلي شروق
شفني على شوقي .. فتحت الك الابواب ..
.
هذا كلامي جاك .. في جزل منطوق
طالب وصالك .. حتى لو شاعرك تاب ..
.
بيني وبينك .. حلف وعهود وحقوق
ياكيف تنقض عهد .. في (سلم الاحباب ) ..
.
لاهنت يافكري .. ولاهنت ياشوق
ولاهنت ياهاجس .. دعيته ولاخاب ..
.
حاولت أصد الشوق .. والصدر صندوق
بس الوصل.. في عين الاشواق كذاب ..