من بعد ابي وش عاد تسوى حياتي

يا ربّ عفوك مابقى في حياتي
اﻻ جروح وذكريات المعاناه
ـ

العين تعزف لي مقام البياتي
والقلب مرواس الحزن والمواساه
ـ

مكسور خاطر.. ماهنيت المباتي
وماعاد باقي لي خبر زين..أواااه
ـ

أصيح من حر المواجع و احاتي
وماعاد لي حيله على الضيق و اقواه
ـ
من حسرتي..ماعاد ادور نجاتي
ضاع الأمل..واﻻ الفرح وين ابلقاه
ـ

صار الحزن حتّى وانا في صلاتي
دايم ملازمني وقلبي تبنّـاه
ـ
ضاقت بي الدنيا.ومن هو سواتي
والله ليبطي حزنه وماتناساه
ـ
ابكي قهر على عظيم امنياتي
ذاك الحبيب وطيب الذكر والجاه
ـ
اللي وجوده كان عندي غناتي
عن كل حاجه في الحياه آتفـدّاه
ـ
رحل وخلّاني على ذكرياتي
ماغير اسجّ بتالي الليل ذكراه
ـ

واناظر اخواني..واناظر خواتي
واناظر امي قبلهم بعد فرقاه
ـ

واْحزن.. واقول الله يجبر سكاتي
بالصبر والسلوان والجرح يبراه
ـ

من بعد ابي وش عاد تسوى حياتي
اصلاً حياتي بعد ابي في معاناه

ـ