ايام الاسبوع عند العراقيين

ايام

الاسبوع عند العراقيين

*چانت أكو عادات وتقاليد مرتبطه بأيام الأسبوع يمارسها العراقيون والبغداديون توارثت عندهم جيلاً من بعد جيل ، منها تقاليد ما زالت باقية ومنها راحت وأخذت أهلها الطيبين وياها ، أيام كانت الناس عايشه عالفطره واعتقد غالبيتنا عايشيها وشايفيها وبعدها محفورة بالذاكرة ، راح ناخذها بالسرة !!* .
١- *يوم السبت*:
*چان يوم ثگيل لانه بداية دوام ، من چانوا الناس صدگ رايحين يداومون ويحللون خبزتهم ، لكن وره الظهر راح يختلف هذا اليوم ،وفي بعض المحافظات يسمونه سبت البنات يرحن البنات 3 اسبوته والرابع يخلنه رهن لمن يجي نصيبهن او ست اسبوته والسابع يخلنه رهن لمن يجي النصيب وهاي المتأخره بالزواج كلش يذبون عبايتها من المناره !
ومن عادات البنات ايام زمان ليلة السبت قبل مينامون يكولون .......ياسبت يامسبوت راويني نصيبي قبل مااموت
حتى تشوف فارس احلامها بلحلم وتعرفه هو منووو ؟؟؟ كون أغلب أهل بغداد يروحون عصر يوم السبت يتباركون بزيارة الإمام موسى الكاظم ، تلگه هناك السني والشيعي ، تحضر الصلاة وتسمع الأدعية وتشوف النسوان توزع مراد ( حلال مشاكل ) ، وتشوف الناس البايتين الجايين من المحافظات گاعدين يطبخون وياكلون وملتمين بالصحن ، ولازم من تطلع من الإمام تروح تزور لسوك الأستربادي وسوك الذهب وسوك المسگف واذا أيام شته لازم ترجع وبيدك حلاوة الدهينه*
٢- *يوم الأحد* :
*هذا اليوم تشوف بيه هواية أفراح ، لأن بهذا اليوم مراسيم ( الحنة ) اللي تسبق ليلة العرس بيوم الاثنين ، لأن المتعارف عليه عند العراقيين من باب البركة يكون الزواج عدهم يوم الأثنين يوم الحسن والحسين !
أو يوم الخميس ، أيضاً يوم الأحد يوم مبارك عند المسيحيين ، تشوف المسيحيين إمبدلين والبنات حاطين حجاب على رؤوسهن وملتمين بباب الكنيسة ، لأن هذا اليوم هو يوم الصلاة ولحد الأن صوت الناقوس يرن بأذاننا يعلن بدء مراسيم الصلاة ، چنه نحترم الواگفين ونسلم عليهم ويردون علينه السلام ونمر من يمهم مرور الكرام* .
٣- *يوم الأثنين* :
*يوم أعراس ويوم خفيف ، وچان عطلة الحلاقين يوم الاثنين يوم مبارك مثل يوم الخميس تلگه أكو ناس تصوم بيه ، وتلگه ناس يوزعون بي ثواب على أرواح موتاهم ، ونفس الشي تتكرر هذه العادات يوم الخميس من باب البركة* .
٤- *يوم الثلاثاء* :
*يوم عادي ويوم ثگيل بطبيعته ، بس چان بيه شي واحد حلو برنامج الرياضة في اسبوع لمؤيد البدري ولقاء مع فنان مديحة معارج والشئ الآخر وهو سوق الثلاثاء چان على أسمه وأتصور ان البعض كان يشعر بيه يوم منحوس ، ولهذا ما چان تصير بيه أي مناسبات* .
*٥- يوم الأربعاء* :
*بهذا اليوم چانت الناس تروح تزور مقام الخضر بالكرخ ليلة الاربعاء ، يروحون يعلگون شموع ويطوفوهن بالشط بنية طلب المراد ، چان مقام الخضر ملتقى للعوائل قبل ، والأحلى ما بيه چانت ركبة البلم من ياخذك ويفرّك بالشط بالليل وأنت تشوف الأضوية الحمر والخضر والصفر عالصوبين معكوسة بنهر دجلة ، تاخذك الأمنيات والراحة النفسية وأنت تشتم ريحة الشط ولا أطيب ريحة بالكون* .
*يوم الأربعاء چان العراقيين معتادين يأكلون سمچ ، وهو موروث شعبي يگولون يكثّر الرزق ، وكذلك يتكرر بهذا اليوم مراسيم الفرح والحنة باعتبار الليلة حنته وباچر يزفونه*.
* ولا ننسى ارتباط الاربعاء بموعد عرض برنامج العلم للجميع لكامل الدباغ* .
٦- *يوم الخميس*:
*كان البعض يسمونه عيد ميلاد إبليس هههههههه
يوم الخميس ( أنيس ودعوته ما تخيس ) يوم الأعراس والأفراح ببيوت العراقيين ، يوم الطلعة والمواعيد والسهر كلها چانت بيوم الخميس ، يوم خفيف ومحبوب وتكثر بيه هوايه مناسبات حتى الشوارع تزدحم بيوم الخميس المحلات الأسواق كلها عامره بأهلها بهذا اليوم ، وتبقه المحافظات منوره والحركة مستمرة لساعات متأخره من الليل بإعتبار ثاني يوم عطلة وچان هذا اليوم يكثر بيه زوار الائمة عليهم السلام يوم بركة ويوم صيام ويوم ثواب الكل يتفائل بيه* . وفي المساء نستعد لبرنامج عدسة الفن خيريه حبيب !
٧- *يوم الجمعة* :
*يوم اللمه والعطلة ، من چانت العطلة صدگ عطلة وچانت الها فرحة ، ريوگنه الصبح گيمر وخبز حار وصمون ومربي التين يوم الجمعة يوم السفرات ، ناس تروح لبلد للسيد محمّد ، وناس تقصد سامره تروح تزور الإمام علي الهادي عليه السلام ، وناس تروح لسد الصدور بديالى ، وناس تروح لسلمان باك ، وناس تروح لأثار عگرگوف ، وناس تروح تتغده مسگوف بالگريعات ، وناس تروح مدينة الالعاب
بهذا اليوم العراقيين يسيّرون على أقاربهم ، تلگه بيوتهم مثل المضايف الجاي متلگينه والرايح مودعينه* .
* الجمعة يوم الأكله المميزة ببيوت العراقيين ، أمهاتنه المعدلات يگعدن من الصبح يسوون للغده باچه لو سمچ لو دولمة* .
*طبعاً يوم الجمعة هو يوم الصلاة ، چانوا الناس يغسلون ويتعطرون ويلبسون دشاديشهم البيضه وعرقچيناتهم ويروحون للمساجد ، من چانت المساجد عامره وتشم بيها ريحة الصالحين ، من چانت المنابر تعلمك عالحلال والحرام وتدعو للمحبة ، من چانوا أهل الدين وجوهم تشع نور وإيمان ، وجوه باسمه وحلوة تحس بيهم صدك من أهل الله* .
*ومن طقوس يوم الجمعة چانت العوائل العراقية البغدادية تروح تزور الامامين بالكاظم عليهم السلام لان بهذا اليوم يسوون بيه ذكر ويوزعون خيرات
والعوائل الكربلائية اتزور الامام الحسين واخيه العباس عليهم السلام والعوائل النجفية اتزور الامام علي عليه السلام والعوائل الجنوبية اتلاكيها متوزعه على كربلاء والنجف والكاظم وتشوف الناس شلون روشه والسيارات والاضوية وقبلها صوت المأذن تكبر للصلاة ، الله يا طيبة أهلها * .
*ونتذكر من عادات يوم الجمعة من چنه صغار چانت أمهاتنه لازم تسبحنه بيوم الجمعة ، لأن ثاني يوم دوام مدرسة ، وعصر يوم الجمعه ننتظر فلم الاسبوع العربي الساعة اربعه وكثير من الأمور اللي تحن الها الذاكرة چانت بهذه الأيام السبعة * .
*أيام چنه لا نسمع بيها طائفية ولا نشوف قتل ، أيام چان يتقاسم بيها السني والشيعي والمسيحي والصابئي والأزيدي والكوردي فرحته ، أيام چانت بيها السمه زرگه صافية وحلوة ، أيام چانت ريحة الأشجار والقداح والرازقي والشبو تملي شوارع المحلة* ..
*أيام أسبوعك يا رب بعدها ، أشجارك بعدها ، سماك بعدها ، بس ليش تغيرت بشرها* اوليش اتبدلت اهلها !!؟؟

سلمت يداك
يعطيك الف عافيه

مُزْنٌ يَهْطُل وشَلآلٌ يَتَدَفَقْ
بَطِرُوحَآتِكْ الْرَآئِعَةْ الْجَمِيلَةَ
بِإخْتِيَآرْ يَفُوقْ الْوَصْفْ والْتَعْبِيِرْ
فَإلَى الأَمَآمْ بِإنْتِظآرِ جَدِيِدِكْ بِشَوقْ
وفَقِكْ الْلَه تَعَآلَى

جلب راقي وانتقاء مميز
بوركت جهودك المثمرة
ولا حرمنا عطائك
ودي ..

شكرا على الطرح الرائع
تحياتي وودي لك مع التقدير

يعطيك الف عافية