لا صار خلك ما يهمه وصالك

بعض الليالي لا أقبلَت طاب حالك
تروح سلوة مثلما النسمة تْروح
والبعض الآخر هَمّ فوق احتمالك
تنزع دموعك مثلما تُنزع الروح
لا صار خِلك ما يهمه وصالك
و غيرك معَ خِله مواعيد ومزوح
والموت لو تشري وصاله بمالك
و يحطّ لك دايم ورى الشوك ساموح
ياللي أحبك كم أحنّ لْدلالك
عقبك ضلوعي تشكي البرد والنوح
كان اهتمامك بي وكثرة سؤالك
يملا لي الدنيا أمل حيّ وطموح
كان الغرور يحقّ لي من جمالك
كني جبل والناس من تحتي سْفوح
واليوم ما واساني إلاّ خيالك
و من نار وجدي عبرتي تسبق البوح
كم صحت أنا للأرض هبّي شَمالك
مجنون أشم الريح وأصيح مبحوح
ذا طيْب خِلّي طيّب الله فالك
ريح الوفا بأنفاسه العطرة تْفوح
عوّد أحس إنّي من الصبر هالك
ما للوصل معنى وأنا فوقي اللوح