ارفق بحال الجريح اللي بليله سرى

الجرح له عام واكثر من سنه ما برى
سهمك سطا بالخفوق وعلتي خافيه


وين انت والوقت الاول بين ستر وذرى
لو السما صحو والا ماهي بصافيه


الليل يمضي وعيني ما تذوق الكرى
أسامر النجم وشموع الفرح طافيه


ارفق بحال الجريح الليّ بليله سرى
لديار تسكن بها يتلمس العافيه


جاك وترجاك في ليل ٍدجاه اسمرى
لجلك توطا المخاطر والقدم حافيه


وإن كان خاب الأمل خليتني بالعرى
في وقت قيض ٍوشمس القيض متعافيه


وأقول يا نفس هيدي والمقدر جرى
وابصحي عيوني اللي ماهي بغافيه