طبعك مو شجي وكتلك شجاني

طبعك مو شجي وكتلك شجاني
اشجنيت وياك شوكلي شجاني
امس جنت انحضن وانشم شجاني
كنفذ والحضن حسرة علية

ارخصك عالجروح وهذا خلة
تلجمة وكلبي خاف يريد خلة
الوفيت وياه كبلك راح خلة
اجة المايشتري يعاين علية

مهلة انطيني واصبرلي لعلماك
اخاف تكول مايدري لعلماك
اني الساري الواكف لعلماك
امنطيح اطيح خركة اعلة الوطية

الحزن لايك على كلبي ويافت
فت كلبي ومعى حيلي ويافت
غبت وانتهت كلش ويافت
اشم بالذيل والراس البلية

زهيري منجلي
اجلي بحديد الزمن مبرد وانة منجلي
بس جية الموت مامنها ابد منجلي
يكولون ليل الحزن لابد وان منجلي
وتطلع علينة شمس لمن وكتها يحن
وجف الهجر حنتة للحنة يرجع يحن
يفلان تدري شوكت كلبك علية يحن
لمن على السنبلة يعطف كلب منجلي

زهيري وشال
راح وكسر خاطري ولملم طيوفة وشال
ونهر المودة نشف ضلت اجروفة وشال
والدهر ماعافني رد عالجفوف وشال
وماعفت انة عشرتك كلبي اعلة حبك ضل
للهجر شو تعتني وعلاوصل كلبك ضل
بجتافي اغطي الشمس بالصيف الملك ضل
ولو مر عليك الشتى لفني اعلة صدرك شال

اسكت لاتضل تشكي بهاماك
وتلوم الروح وتعضعض بهاماك
اخذ طبع النخل وارفع بهاماك
واذا بالطين عركك هاي هية

الدنيا اشما احبنها وبرها
تزرفني بمخايطها وبرها
جاعت ناكتي وكلت وبرها
الدرب طول واخاف ترد علية

عليمن تحسب اغلاطة تعدلة
الميت بالبجي شتظن تعدلة
العوج عودة صعب ضلة تعدلة
يضل اعوج لمة اتلفة المنية

تحب بية طبع لاذم ولاداس
وجدمي مامشة الشينة ولاداس
لهذا ماربح حظي ولاداس
وصفة حتى الربح خسران الية

انة من الجرح ماخاف لوسال
يرى شامت واخاف شلون لوسال
سيفك بالجذب لعداي لوسال
علي هد واكولن هد الية