اشد عزمي اليوم شد المطايا

اشد عزمي اليوم شد المطايا
ماهي بشداتن ثقيل العزومي

وانسج حروفن من عيون المرايا
تلعب على هامات شم الخشومي

والبوح فنن عاشقن للصبايا
يلبس احاسيسي كلبسي هدومي

انسج حروف البوح تحت الحنايا
وامرح مع قافً يبجّل علومي

علوم صدقن ماتشوب الخفايا
من بارقن لمّاع وسط الغيومي

كعيون نجلى جالبات المنايا
ياكنها ريحن بيومن حسومي

مستقبله دربي وثابت خطايا
جنحان طيرن في سماها يحومي

اشواقنا تُعطى لجزل العطايا
مانرتجي للطيب فضلن يدومي

يابوحي الي فيك يسكن رضايا
لك من تباريح المعاني حلومي

حلمن نما في داخلي من صبايا
وان غاب عني قلت للنفس صومي

اجمع من ازهار المحبه هدايا
وانحاز الى ربعي وهذي سلومي

قومن لهم بالطيب كل السجايا
كفوفهم تنمد عند اللزومي

ليه الغصون اليوم باتت عرايا
وليه الليالي مثقله بالهمومي

اشد عزمي اليوم شد المطايا
ماهي بشداتن ثقيل العزومي