يالمخلي القصايد تشتعل بسمك

يطك بيه الفرح حنه
لون اسمع مكاتيبك حجتها البوب

وتفز بريتي كل جلمة غفت ومتانية تغنيك
يالمخلي القصايد تشتعل بسمك
اثاريني من اشوف اسمك اخضر عالمري بلوني

شكثر بيه فرح يتسابك لجيتك
يطش شوباش لو تجبل

وانه بروحي شلب يتفرفح بطولي
ويريد بمايك يسيس

شكثر مشتاك افك حزني اعله بيبانك
عندي جفوف مضنوكة ولصابيعك
تسافر رايده تشمك
اصابيعك وطن للرايد يشمك

مر بيه سواجي بروحي زحمة كيض
مر بيه وي كل مغرب حمار الشمس يلجمني
ويذكرني بمواعيدك

مره بيه تره الحيطان تسمعني
من اكلله الحزن يتسابك بروحي
بس طيفك ولايسمع

كل معضد يطك بجفوف الحديثات يلجمني
وتلجمني العيون الترتوي بطولك

ولك يسمر سمار البيك ياخذني
اعله كل ديره فجرها يسولف بلونك
اغاني هواي غنولي ومامش صوت يقراني

غنيلي الغنة منك يجيس
اعتاب كل نجمة اشتهت تتغنه بعيونك
غنيلي التعب يتسرسح بصوتك ويرد حيله بطواريك

يمن صوتك يناغيني ويجيس بداخلي الظلمة ويوج حلمك
يذاك انت كحل تتسابك تغينك كل مراية مطفية

كحلك ينده عيوني واجي يمك مناير شوف
مناير تشتهي ترسمك
وتخط اسمك اعله متون النجم ذكرى

بحياطيني عفت ذكرى الحزن بيها بده بشامة
بهت دربي وعتك بيه التراب
الماحضه بجدمك

سولفني اشتيهت انكال بشفافك
سولفني العتب بيه خذاني هناك
على طول السواجي الغنت اهلالك
انه البيه سمر عيدين لهلالك



امير شمران