قلبي اتدبح بقلمي الشاعر محمد البهلوان

انا قلبي من كتر الهموم
اتدبح
بيصرخ يا عالم من الجراح
صوته اتنبح
الواطي فيكي ليه يا دنيا
يبقي الجدع
والغالي يرخص تمنه
بقى مرتجع

انا قلب ميت من الآلأم
ومن الوجع
واتبعت يا دنيا بالرخيص
ومين سمع
يا دنيا فيكي الحظ راح
عملت البدع
وجبت كل العرافين
كسروا الودع

شمالنا اعلي من اليمين
دنياة شمال
الصفوة هم الكدابين
صدق اللي قال
لا تأمن يوم للي خان
ولا الجبان
يا دنيا فيكي الحب هان
ورخص الحنان

تشوفه تقول عليه رجولة
وابن بلد
معاك في الحلوة والمُرة
يسند وتد
ويعلي عليك عشان بقي غير
لاعيب ولد
اصل الفلوس جريت في ايديه
وبقت عدد

الدنيا غابه وفيها ناس
زي الوحوش
كوش يا عم ولم بس
ومين يحوش
يا دنيا فيكي ليه الضعيف
متاكل فشوش
مجرور في همه واللي المه
مهموش

يمين شمال متلقيش
غير مر نار
بقى همنا لقمة العيش
شوية خضار
العيشة مُرة والحياة
طفحت مرار
والغربة صعبة والتمن سنين كُتار

لكل ظالم يوم معلوم
وله حساب
ياما جنة يا ما نار
والعذاب
كله متقيد عند ربك
في الكتاب
وهناك مفيش ولا مظلوم
ربك وعد

بقلمي الشاعر محمد البهلوان
يحظر نقل او نسخ العمل دون الاشارة للمصدر

هذا العمل تعديل كبير اووي ويعتبر عمل جديد عن اي منتديات اخرى
في 9 ديسمبر 2024