ياعاطي الامان في الدنيــــــا نوصيــــك

هذه قصيدة للشاعر عبد الرحمن قاسم


ياعاطي الامان في الدنيــــــا نوصيــــك * دوارة من بعد تخدع مولاهـــــا
تضحكلك في الشاو, دايــــــم واتزهيـــك * بعد الزهو ادور عنك باقفاهـــــا
كمن واحد في هواها مـــــــات اهليـــك *وكمن واحد حار بعد انثقاهـــــــا
مثل العذرة تاحفة تفتـــــــن واتجيـــــك *في عينك تحلى وقلبك يرضاهـــا
تخطف عقلك بالبشاشــــــــة والدربيــــك * واتجرك واتعود تايه في هواها
اتمشيك اطريقها وعـــــــرة تديـــــــــك * ظلمة وليك اتبان تلمع مظواهـا
في الغالب وقت الشباب الي تسبيــــــــك * تحلا لك لفراح فيها وانزاهــــــا
من المر اتشربـــــــك تروى تسقيــــــك * والحنضل ابانلك يعجب ماهــــا
لكن وقت الكبر تنــــــــدم واتعاديـــــــك * قدامك تعواج منجل تلقاهـــــــــا
ذاك الوقي اتفيق بلي لعــــــــبت بيـــــك * تندم عن مفاتلك قبل اماعاهــــــا
مثل الطير الطير عنــــــــك واتخليــــك *واش تعمل للطايرة ومن يصفاها
تكبر يسلط بيك شيبــــــــك ويغطيـــــك * تتعذب وامنيتك تتمناهـــــــــــــا
آمني ياسامع القصــــــــة يهديــــــــــك * راني امجرب ذي الدنيا واشقاها
عندك يامسكين شيطانــــــــك يغويـــك * واتكرك هذي الدنيا لبلاهـــــــــــا
هلكت ناس اكثير قبلك لايخــــــــفيــك * وما حنت محال عنهم مقساهـــــــا
نعطيلك مثال ياغالــــــــط يكفيــــــك *نذكر لك رجال ضاعت وانساهــــا
فكر ذو القرنين ياغالط واشبيــــــــك * هاجوج وماجوج بالسد انفاهـــــــــا
وسليمان الريح رسول ونبيـــــــــــك * حاكم بعد الرب في الأرض الداهــا
يحكم في الزحاف والماشي نريــــــك* والمارد والطايرة في سماهـــــــــــا
وين اسكندر وين كسرى وانضر ليك * وين اصحاب الفيل كانت مقواهــــا
وابو القيس وزينها بكري يرضــــيك * وكيلو بترا بعد ماشاع اســــــــماها
وين القيصر وين لدزار انشفـــــــيك * وهتلرالي ذي الدنيا رعاهـــــــــــــا
نار يمان وين فروق الــــــــــــمليك * وافراعين في مصر قبله وراهـــــــا
ثرية اران قصتها تنـــــــــــــــــبيك * بعد العز الشاه صمم خلاهـــــــــــــا
ذي الأسامي تقنعك يمكن تكفيـــــك * بعد العزاتراب والدود اكلاهــــــــــــا
وانت ياقلبي اتخمم في مضـــــيك * واش انت من ناس الي قلنـــــــــــاها
من رايك حبيت عبد الي خليــــك * آمنت الدنيا المرا وامنـــــــــــــــــاها
مايغيضكش الحال في الي صاير فيك*واش انت من قيس ليلى واخطــاها
واش انت من حب عنتر لايبليك * عبلة اخذات الغير واصبر وانســاهــــا
واش انتايا من سعيد صاراهليك * من حيزية بنت عمه وابهاهــــــــــــــا
واش انتايا من استيفن ديرو ليك * فارق مجدولين والنفس اهداهــــــــا
ياقلبي بعد المشقة انشير عــليك *واتمسك بدبارتي واتلقاهـــــــــــــــــــا
اقسى ياقلبي وانسا من ينسيــــك* واغلب نفسك من المعاصي بركاها
توب ياقلبي من الزوابع غير اخطيـك * وهذي الدنيا والشهاوي اجفاها
خمم يوم القبر عزرينك ياتيـك * وافعالك مادرت بيدك تقراهـــــــــــا
يلزم دير الخير تلقى مستنيــك * والسيات الماضية تتلقاهــــــــــــــــا
هذا رب احنين بالك يرفق بيك * وشديد العقاب عندك تنساهـــــــــــا
شعر الحاج عبد الرحمن قاسم (عن مجلة الوان)