(شهرزاد ) بقلم تامر النقيب

يا صوت حزن الناي فى أعماقي
ياعشق مخنوق م السنين
قلبك حزين
طب ليه كدا ؟
ليه سايبه روحك جوه مني منكده؟
وغياهب العمر اللي راح بِضُم فيه
تايها في خوفك قولى ليه ؟
العمر بيروح مننا
وكأننا ورد ما بيشفش الندى
والله حضنك ليا أنا
أنا ليا يجي كام سنه
بستني أسمع كلمتک
أنا ليا يجي كام سنه
قاعد مراقب سكتک
خايف تمرى أكون كفيف
مقدرش يومها ألمحک
خايف أحسك وتشوفيني
ولمستي تحضن إيديکِ فـ تجرحک
خايف أبوح والروح تروح
لو ترفضي كلمه عشقت
سيفك يطول قلبي الغريب .
. ماهو مرة قولتيلي إنت مين ؟
وصدتيني بكلمتين
فـ مشيت حزين
ولقتني تايه وسط دوامه حنين
ماسك ربابتي الطيبه
وأوتارها بتعيط أنين
والله حضنك ليا أنا .
. وأنا حضني ليکِ
بتاخدى رکن مني ليه ؟
ومعايا مش مطمنه
والخوف مليکِ
دلوقت بقا آن الأوان
إني أضمك وأحضنک
والله حضنک ليا أنا ..
وحضني ليكي كون براح
متحملك
صابر علي البعد سنين
والصبر من صبره دا راح
آن الأوان والفجر لاح
يطلع مابينا الصبح يمكن نلتقي
قلبك دا محبوس في الوجع
خليه يخف من الألم ليا يرق
إنتي اللي عشقك فيا دق
وشق روحي وقال سلام
إنتي الأغاني والقصايد والورق
وإنتي الحروف وسط الكلام
لو مهما طال العمر بينا هعشقک
وأبقى لقلبك مركبه لبر الأمان
وأطير بروحک عمرنا .. وكأننا حمام السلام
صبرک عليا وحق طه المصطفي
لأغزل من الأشواق عقود
والبسک تاج الغرام .. وخواتم النور والورود
فستان فرح
راح أطرزة بالنبض لجل يدق فيکِ
وهتبقي ليا شهرزاد .
والألف ليله متنتهيش
وهلف بيکِ في البلاد ک السندباد
وأعمل حاجات مهتتحكيش
وهقيد نيران الحب لجلن تلهبک
وتزويديها بالهوى فمتنطفيش
قولي بحبک أيوا نفسي أكون معاک
نفسي أعيشک وأبقي أنا جنه هواک
خليکِ جنبي متبعديش
والله مش عارف أعيش
الشِعر مكسوف يوصفک
والحِبر خايف يكتبک
والليل بقا بيغني موالک تملي ع النايات
بس إنتي ليه مفهمتنيش ؟
قومي إنفضي حزن الليالي المرعبه
ثورى ع الأحزان بصوت
عامله حداد علي حبنا ..
وقلبك يدق ليه في سكوت ؟
يلا إسكنيني وجوة مني إتمخطري
صُبيلنا م الأحلام كاسات
وإملي من الأفراح كاسات
وإنسي الآهاات
وإنسي دموعک واللي فات
خلي البلابل جوه بستان الدموع
تفرح و تعمل أغنيات
وبلاش تقولى الفرح مات
أنا كل لحظه بُعد عنک
بحس نفسي مش تمام
جوايا مولد عاشقين والناس زحام
عشاق بتمدح حبها جوة ضريح الأمنيات
وانا اللي مش درويش كلام
بطلت أزورك فى المنام
علشان بخاف
صابني الجفاف
م البعد وسنين لإنتظار
حتي لقاکي في المنام
أصبح حرام

ــــــــــــــــــــــــــــــــــــــــــــــــــ ـــ
#خربشات_نقيبيه
#تامرالنقيب